പുതിയ ഐപാഡ് മോഡലുകൾ പുറത്തിറക്കാനൊരുങ്ങി ആപ്പിൾ. വരും മാസങ്ങളിൽ കൂടുതൽ ഐപാഡ് മോഡലുകൾ അവതരിപ്പിക്കാനുള്ള തയാറെടുപ്പിലാണ് ആപ്പിളെന്ന് ദേശീയ മാദ്ധ്യമങ്ങൾ റിപ്പോർട്ട് ചെയ്യുന്നു. ഐപാഡ് മിനി, രണ്ട് ഐപാഡ് എയർ മോഡലുകൾ, ഒരു എം3 ഐപാഡ് പ്രോ എന്നിവയാകും കമ്പനി അവതരിപ്പിക്കുക എന്നാണ് സൂചന.
ഈ വർഷം അവസാനത്തോടെയോ അടുത്ത വർഷം ആദ്യമോ പുതിയ ഐപാഡ് മിനി പുറത്തിറക്കിയേക്കും. ജെ126ബി എന്ന കോഡ് നെയിമാണ് ഇതിന് നൽകിയിരിക്കുന്നത്. നിലവിലുള്ള മോഡലുകളുടെ അതേ രൂപകൽപ്പന നിലനിർത്തിയാകും ഐപാഡ് മിനി 7 പുറത്തിറങ്ങുക. 2021 സെപ്റ്റംബറിലാണ് ഐപാഡ് മിനി മോഡലുകൾ കമ്പനി അവതരിപ്പിക്കുന്നത്. എ15 ബയോണിക് ചിപ്പ് ആണ് ഇതിൽ ഉപയോഗിച്ചിരുന്നത്.
പുതിയ ഐപാഡ് മിനിയിൽ വേഗമേറിയ ചിപ്പ് ഉണ്ടാകുമെന്നാണ് റിപ്പോർട്ടുകൾ. കൂടാതെ പുതിയ എൻട്രി ലെവൽ ഐപാഡ് അവതരിപ്പിക്കുന്നതിനുള്ള ശ്രമവും നടന്നു വരികയാണ്. ഐപാഡ് എയറിന് സമാനമായി യുഎസ്ബി ടൈപ്പ് സി പോർട്ട് ഉൾപ്പെടുത്തിയാകും ഇത് പുറത്തിറക്കുക. ജെ507, ജെ508 എന്നിങ്ങനെയാണ് ഇതിന് നൽകിയിരിക്കുന്ന കോഡ് നെയിം. ഐപാഡ് എയറിന്റെ വലിപ്പത്തിലും സവിശേഷതകളിലും മാറ്റങ്ങൾ ഉണ്ടായേക്കാം എന്നാണ് റിപ്പോർട്ടുകൾ. ഐപാഡ് പ്രോയിൽ എം3 ചിപ്പ് ഉൾപ്പെടുത്തിയേക്കും.
