ലഡാക്ക്: ലഡാക്കിലെ മൗണ്ട് കുനിൽ ഉണ്ടായ ഹിമപാതത്തിൽ ഒരു സൈനികൻ വീരമൃത്യുവരിക്കുകയും മൂന്ന് പേരെ കാണാതാവുകയും ചെയ്തു. ഇന്ത്യൻ കരസേനയുടെ പർവ്വതാരോഹക സംഘത്തിൽ ഉൾപ്പെട്ടവരാണ് അപടത്തിൽപ്പെട്ടത്.
സൈന്യം നൽകുന്ന വിവരം അനുസരിച്ച്, ഹൈ ആൾട്ടിറ്റിയൂഡ് വാർഫെയർ സ്കൂളിലെയും (എച്ച്എഡബ്ല്യുഎസ്) ആർമി അഡ്വഞ്ചർ വിംഗിലെയും 40 ഓളം സൈനികർ അടങ്ങുന്ന സംഘം മൗണ്ട് കുനിന്് സമീപം പതിവ് പരിശീലന പ്രവർത്തനങ്ങൾക്ക് എത്തിയതായിരുന്നു. എന്നാൽ അതിനിടയിൽ ഉണ്ടായ ഹിമപാതത്തിൽ സംഘത്തിലെ നാലുപേർ അകപ്പെട്ടു. ഉടൻ തന്നെ രക്ഷാപ്രവർത്തനം ആരംഭിച്ചിരുന്നു. കനത്ത മഞ്ഞു വീഴ്ചയും പ്രതികൂല കാലാവസ്ഥയും രക്ഷാപ്രവർത്തനം ദുഷ്കരമാക്കി. നീണ്ട നേരത്തെ രക്ഷാപ്രവർത്തനത്തിന് ശേഷമാണ് ഒരു സൈനികന്റെ മൃതദേഹം കണ്ടെത്തിയത്. ഇനി മൂന്ന് പേരെ കൂടി കണ്ടെത്താനുണ്ട്.