പ്രശസ്ത ബോളിവുഡ് സംവിധായകൻ സഞ്ജയ് ലീല ബൻസാലി ദീർഘനാളുകളായി മനസിൽ കൊണ്ടുനടക്കുന്ന ചിത്രമാണ്’ബൈജു ബാവ്റ’. സഞ്ജയ് ലീല ബൻസാലിയുടെ സിനിമാ ജീവിതത്തിലെ ഏറ്റവും മികച്ച പ്രൊജക്ടുകളിലൊന്നായിരിക്കും ഇതെന്നാണ് പറയുന്നത്. രാം ലീല, പത്മാവതി, ബാജിറാവു മസ്താനി എന്നീ ഹിറ്റ് ചിത്രങ്ങൾക്ക് ശേഷം സഞ്ജയ് ലീല ബൻസാലി സംവിധാനം ചെയ്യുന്ന ചിത്രമാണ് ഇത്.
കഴിഞ്ഞ രണ്ടു വർഷത്തോളമായി ചിത്രത്തിലെ കാസ്റ്റിംഗിനെക്കുറിച്ചുള്ള വാർത്തകൾ എത്തുന്നുണ്ട്. എന്നാൽ ഇതുമായി ബന്ധപ്പെട്ട് ഇതുവരെ ഔദ്യോഗിക സ്ഥിരീകരണമൊന്നും വന്നിട്ടില്ല. എന്നാൽ ഈ ഇതിഹാസ ചരിത്ര ചിത്രത്തിൽ നായകനായി രൺവീർ സിംഗിനെയും നായികയായി ആലിയ ഭട്ടിനെയുമാണ് തീരുമാനിച്ചിരിക്കുന്നതെന്നാണ് ലഭിക്കുന്ന വിവരം.
സഞ്ജയ് ലീല ബൻസാലിയുടെ ‘രാം ലീല’, ‘പത്മാവതി’ അടക്കമുള്ള ചിത്രങ്ങളിൽ ദീപിക നായികയായിരുന്നു. അതിനാൽ രൺവീർ സിംഗിനൊപ്പം ആദ്യം ദീപിക പദുക്കോണിനെ നായികയാക്കാൻ തീരുമാനിച്ചിരുന്നു. എന്നാൽ ഭർത്താവായ രൺവീർ സിംഗിന് കൊടുക്കുന്ന പ്രതിഫലം വേണമെന്ന് ആവശ്യപ്പെട്ടതോടെ നിർമ്മാതാക്കൾ വിസമ്മതിക്കുകയായിരുന്നു. ഇതോടെ ദീപികയ്ക്ക് പകരം ആലിയ ഭട്ടിനെ നായികയാക്കുകയായിരുന്നു. ബൻസാലിയുടെ ഗംഗുബായ് കത്തിയവാഡി എന്ന ചിത്രത്തിൽ ആലിയയായിരുന്നു നായിക.
അതേസമയം ഈ ചിത്രത്തിൽ തെന്നിന്ത്യൻ ലേഡി സൂപ്പർ സ്റ്റാർ നയൻതാരയും എത്തുന്നു എന്ന വാർത്തയും വരുന്നുണ്ട്. നയൻതാരയെ ഒരു പ്രധാന കഥാപാത്രത്തിനായി പരിഗണിക്കുന്നുണ്ടെന്നാണ് ഒരു ദേശീയ മാദ്ധ്യമം റിപ്പോർട്ട് ചെയ്യുന്നത്. ഷാരൂഖ് ഖാന്റെ ‘ജവാനിലൂടെ’ നയൻതാര ഇതിനോടകം തന്നെ ബോളിവുഡിൽ അരങ്ങേറ്റം കുറിച്ചു കഴിഞ്ഞതിനാൽ ഇത് യാഥാർത്ഥ്യമാകാനും സാധ്യതയേറെയാണ്. രൺവീറിനും ആലിയയ്ക്കുമൊപ്പം നയൻതാര കൂടി എത്തുമ്പോൾ പ്രതീക്ഷ ഇരട്ടിയാണെന്ന് ആരാധകർ പറയുന്നു. എന്നാൽ നയൻതാര ഇതുവരെ കരാറിൽ ഒപ്പിട്ടിട്ടില്ലെന്നാണ് റിപ്പോർട്ടുകൾ.
