സാങ്കേതിക വിദ്യ അനുദിനം വളർന്നുകൊണ്ടിരിക്കുന്നതിന്റെ അപ്ഡേറ്റുകൾ ഒരോ ദിവസവും പുറത്തു വന്നുകൊണ്ടിരിക്കുകയാണ്. എത്ര വലിയ പ്രൊട്ടക്ഷനോട് കൂടി കൊണ്ട് നടന്നാലും വരവീഴാതെ ഫോണിന്റെ സ്ക്രീൻ സംരക്ഷിക്കുക എന്നത് വെല്ലുവിളികൾ ഏറെയുള്ള ഒരു കാര്യമാണ്. എന്നാൽ ഇതിന് ഒരു ആശ്വാസ വാർത്തയാണ് ഇപ്പോൾ സമൂഹമാദ്ധ്യമങ്ങളിൽ നിറയുന്നത്.
ഇനി വരുന്ന അഞ്ച് വർഷത്തിനുള്ളിൽ സ്വമേധയ റിപ്പയർ ചെയ്യാനാകുന്ന ഡിസ്പ്ലേകൾ സ്മാർട്ഫോണുകളിൽ എത്തുമെന്നാണ് കണ്ടെത്തൽ. അനലിസ്റ്റ് സ്ഥാപനമായ സിസിഎസ് ഇന്റർനെറ്റ് ആണ് ഇക്കാര്യം വെളിപ്പെടുത്തിയിരിക്കുന്നത്. സ്വയം പ്രശ്ങ്ങൾ പരിഹരിക്കുന്നതിനുള്ള ഡിസ്പ്ലേ സജ്ജമാക്കുന്നതിനുള്ള പ്രവർത്തനങ്ങൾ ഇതിനോടകം തന്നെ പല ബ്രാൻഡുകളും ആരംഭിച്ചതായാണ് റിപ്പോർട്ട്.
സ്ക്രീനിൽ വര വീഴുമ്പോൾ തന്നെ അന്തരീക്ഷത്തിലെ വായുവും ബാഷ്പവും ചേർന്ന് പുതിയ ഒരു വസ്തു നിർമ്മിക്കുന്നു. ഇതിലൂടെ സ്ക്രീനിൽ രൂപപ്പെട്ട വരകൾ ഇല്ലാതാക്കുകയും ചെയ്യുന്ന നാനോ കോട്ടിംഗ് സംവിധാനമുള്ള സ്ക്രീൻ ആകും ഇതെന്നാണ് പുറത്തു വരുന്ന റിപ്പോർട്ടുകൾ. എന്നാൽ സ്ക്രീനിൽ ഉണ്ടാകുന്ന വലിയ പൊട്ടലുകൾ ഇല്ലാതാക്കാൻ ഇതിന് സാധിക്കില്ല. ചെറിയ ചെറിയ സ്ക്രാച്ചുകൾ മാത്രമാകും പരിഹരിക്കാൻ സാധിക്കുക.
സെൽഫ് ഹീലിംഗ് ഡിസ്പ്ലേ സാങ്കേതിക വിദ്യയുടെ ഭാഗമാകാൻ മോട്ടോറോള, ആപ്പിൾ എന്നിങ്ങനെ നിരവധി കമ്പനികൾ പേറ്റന്റുകൾ ഫയൽ ചെയ്തിട്ടുണ്ട്. മെമ്മറി പോളിമർ ഉപയോഗിച്ചുള്ള സാങ്കേതിക വിദ്യയാണിത്. ചെറിയ ചൂട് ലഭിക്കുന്നതോടെ സ്ക്രാച്ചുകൾ ഇല്ലാതാകും.