ലക്‌നൗ; ഓസ്‌ട്രേലിയയോട് തോല്‍വി ചോദിച്ച് വാങ്ങി ലോകപ്പിലെ പരാജയത്തില്‍ റെക്കോര്‍ഡ് ഇട്ട് ശ്രീലങ്ക. ഇതുവരെ 83 മത്സരങ്ങള്‍ കളിച്ച ശ്രീലങ്ക 42 മത്സരങ്ങളാണ് തോറ്റത്. നാണക്കേടിന്റെ റെക്കോര്‍ഡ് സിംബാബ്‌വെയ്‌ക്കൊപ്പം പങ്കിടുകയാണ് ലങ്കന്‍ ടീം. 57 കളികളില്‍ നിന്നാണ് സിംബാബ്‌വെ 42 മത്സരങ്ങളില്‍ തോറ്റമ്പിയത്.കൈയിലിരുന്ന കളി കൈവിട്ട് ഇന്നലെ അര്‍ഹിച്ച തോല്‍വിയാണ് ശ്രീലങ്ക ചോദിച്ച് വാങ്ങിയത്. ഒന്‍പതാം തവണയാണ് ഓസ്‌ട്രേലിയയോട് ലോകകപ്പില്‍ പരാജയപ്പെടുന്നത്.
ഇതും മറ്റൊരു റെക്കോര്‍ഡാണ്. ലോകകപ്പില്‍ ഒരു ടീമിനോട് ഏറ്റവും അധികം തോല്‍വി വഴങ്ങുന്നുവെന്ന റെക്കോര്‍ഡും ശ്രീലങ്ക സ്വന്തമാക്കി. അഞ്ചുവിക്കറ്റിന്റെ വിജയത്തോടെ ഓസ്‌ട്രേലിയ ഇന്നലെ ലോകകപ്പ് കാമ്പെയിനിലെ അവരുടെ ആദ്യ വിജയം സ്വന്തമാക്കി. ഒരു വേള 300ന് മുകളില്‍ പോകുമെന്ന് കരുതിയ ശ്രീലങ്കന്‍ ടോട്ടലാണ് 209 റണ്‍സില്‍ ഒതുങ്ങിയത്. അനാവശ്യ ഷോട്ടിന് മുതിര്‍ന്ന് മദ്ധ്യനിര ഒന്നാകെ കൂടാരം കയറിയതോടെ 50 ഓവര്‍ ബാറ്റിംഗ് പൂര്‍ത്തിയാക്കാനാവാതെയാണ് ശ്രീലങ്ക ചീട്ടുകൊട്ടാരം പോലെ തരിപ്പണമായത്.
ഒപ്പണിംഗ് വിക്കറ്റില്‍ 125 റണ്‍സ് കൂട്ടുകെട്ടുയര്‍ത്തി നിസംഗയും കുശാല്‍ പെരേരയും ലങ്കയ്‌ക്ക് സ്വപ്‌ന തുടക്കമാണ് നല്‍കിയത്. എന്നാല്‍ പിന്നീട് വന്നവര്‍ക്കാര്‍ക്കും സ്‌കോര്‍ ഉയര്‍ത്താന്‍ സാധിച്ചില്ല. ഓസ്‌ട്രേലിയന്‍ ബാറ്റിംഗ് തുടങ്ങിയതും തകര്‍ച്ചയോടെയായിരുന്നെങ്കിലും ബാറ്റിംഗ് നിര ഉലയാതെ പിടിച്ചു നിന്നു. ദില്‍ഷന്‍ മധുഷാനകയാണ് ആദ്യ വിക്കറ്റുകള്‍ തെറിപ്പിച്ച് ഓസ്‌ട്രേലിയയെ ഭീതിയിലാഴ്‌ത്തിയത്. ഡേവിഡ് വാര്‍ണറും സ്മിത്തും ആദ്യ നാലോവറിനിടെ പുറത്തായി.
എങ്കിലും ഫോമിലേക്കുയര്‍ന്ന മിച്ചല്‍ മാര്‍ഷിന്റെയും ജോഷ് ഇംഗ്ലിസിന്റെയും അര്‍ദ്ധ സെഞ്ച്വറിയും ലംബുഷെയ്‌നിന്റെ 40 റണ്‍സും ഓസ്‌ട്രേലിയക്ക് ആദ്യ വിജയം സമ്മാനിക്കുകയായിരുന്നു. ലോകകപ്പിലെ സ്റ്റീവന്‍ സ്മിത്തിന്റെ ആദ്യ ഡക്കായിരുന്നു ഇന്നലത്തേത്. ലോകകപ്പില്‍ ശ്രീലങ്കയുടെ തുടര്‍ച്ചയായ മൂന്നാം തോല്‍വിയായിരുന്നു ഇന്നലത്തെ.
