പദ്ധതിക്ക് പണം കൂട്ടുന്നത് ഞങ്ങൾ, അതുകൊണ്ട് പരിപാടി നടത്തുമ്പോൾ ആളുകളെ കൂട്ടാനുള്ള മര്യാദ കാട്ടണം; ഉദ്ഘാടന വേദിയിൽ ആളൊഴിഞ്ഞ കസേരകൾ കണ്ട് പഞ്ചായത്ത് പ്രസിഡന്റിനെ ശകാരിച്ച് എംഎം മണി

ഇടുക്കി: കുട്ടാറിൽ ഉദ്ഘാടനത്തിനെത്തിയപ്പോൾ ഒഴിഞ്ഞ കസേരകൾ ആളൊഴിഞ്ഞ കസേരകൾ കണ്ട് പഞ്ചായത്ത് പ്രസിഡന്റിനെ
ശകാരിച്ച് എംഎം മണി. കരുണാപുരം പഞ്ചായത്തിന്റെ ഓപ്പൺ സ്റ്റേജ് ഉദ്ഘാടനത്തിനിടെയായിരുന്നു സംഭവം.

”ആളെക്കൂട്ടി വേണം പരിപാടി വയ്‌ക്കാൻ, അതൊന്നും ചെയ്തിട്ടില്ല. പദ്ധതിക്ക് പണം മുടക്കുന്നത് ഞങ്ങളാണ്. അതുകൊണ്ട് പരിപാടി നടത്തുമ്പോൾ ആളുകളെ കൂട്ടാനുള്ള മര്യാദ കാട്ടണം. ചുമ്മാ ഒരുമാതിരി ഏർപ്പാടാ നടത്തിയത്. എനിക്കീ കാര്യത്തിൽ കടുത്ത അഭിപ്രായവ്യത്യാസമുണ്ട്”. പഞ്ചായത്ത് പ്രസിഡന്റ് എന്ന രീതിയിൽ നിങ്ങളിക്കാര്യത്തിൽ സാമാന്യമര്യാദ കാണിച്ചില്ലെന്നാണ് എംഎം മണി പഞ്ചായത്ത് പ്രസിഡന്റിനോട് പറഞ്ഞത്.

ഇതിന് പിന്നാലെ സ്റ്റേജ് ഉദ്ഘാടനം ചെയ്തതായി അറിയിച്ച് എംഎം മണി വേദി വിട്ടു. എന്നാൽ സമയത്തിന് മുമ്പേ ഉദ്ഘാടന യോഗം ആരംഭിച്ചത് കൊണ്ടാണ് ആളുകൾ കുറഞ്ഞതെന്ന് പഞ്ചായത്ത് പ്രസിഡന്റ് മിനി പ്രിൻസ് പറഞ്ഞു. എംഎൽഎ പറഞ്ഞ സമയത്തിന് മുമ്പേ എത്തി യോഗം ആരംഭിക്കാൻ പറയുകയായിരുന്നു. ആറ് മണിക്കായിരുന്നു സമയം നിശ്ചയിച്ചിരുന്നത്. എന്നാൽ എംഎൽഎ 5.15ന് എത്തി. ഇതോടെയാണ് ആളൊഴിഞ്ഞ വേദിയിൽ ചടങ്ങ് നടത്തേണ്ടിവന്നതെന്നും മിനി പ്രിൻസ് പറയുന്നു.