ന്യൂഡൽഹി: കേന്ദ്ര സർക്കാർ ജീവനക്കാരുടെ ക്ഷാമ ബത്ത അഥവാ ഡിഎ നാല് ശതമാനം വർദ്ധിപ്പിച്ചു. ഇന്ന് ചേർന്ന മന്ത്രി സഭാ യോഗമാണ് ഡിഎ കൂട്ടുന്നതിനുള്ള ശുപാർശ അംഗീകരിച്ചത്. പെൻഷൻ വാങ്ങുന്നവർക്കും ഇതിന്റെ ആനുകൂല്യം ലഭിക്കുന്നതായിരിക്കും. ഇതോടെ കേന്ദ്ര സർക്കാർ ജീവനക്കാരുടെ ഡിഎ 42 ശതമാനത്തിൽ നിന്നും 46 ശതമാനമായി ഉയർത്തി. 47 ലക്ഷം കേന്ദ്ര സർക്കാർ ജീവനക്കാർക്കും 68 ലക്ഷം പെൻഷൻ വാങ്ങുന്നവർക്കുമാണ് ഈ ആനുകൂല്യം ലഭ്യമാകുക.
ഇനി വരുന്ന ഉത്സവ സീസണുകൾ കൂടി പരിഗണിച്ചാണ് കേന്ദ്രസർക്കാരിന്റെ തീരുമാനം. വർദ്ധിപ്പിച്ച ഡിഎ ഈ വർഷം ജൂലൈ മുതലാകും പ്രാബല്യത്തിൽ വരിക. മുൻകാല പ്രാബല്യത്തോടെ നവംബർ മാസത്തിൽ ശമ്പളത്തിനൊപ്പം കുടശ്ശികയായി ലഭിക്കും.ഏറ്റവും പുതിയ ഉപഭോക്തൃവില സൂചിക അടിസ്ഥാനപ്പെടുത്തിയാണ് ജീവനക്കാരുടെ ഡിഎ കണക്കാക്കിയിരിക്കുന്നത്.
ഗ്രൂപ്പ് സി, ഗ്രൂപ്പ് ബി എന്നീ വിഭാഗങ്ങളിലെ ചിലർക്ക് കഴിഞ്ഞ ദിവസം ദീപാവലി ബോണസ് കേന്ദ്ര സർക്കാർ പ്രഖ്യാപിച്ചിരുന്നു. 7,000 രൂപ വരെയാണ് ബോണസ് ആയി ലഭിക്കുക.
