ഒരു കാലത്ത് മനുഷ്യർ ചെയ്തിരുന്ന ജോലികൾ ഇന്ന് ആർട്ടിഫിഷ്യൽ ഇന്റലിജൻസ് മുഖേന ചെയ്ത് തീർക്കാൻ സാധിക്കുന്നുണ്ട്. നിർമ്മാണം, ഉപഭോക്തൃ സേവനം, ആരോഗ്യ സംരക്ഷണം, ഗതാഗതം എന്നിങ്ങനെ വിവിധയിടങ്ങളിൽ ഇന്ന് എഐ സാങ്കേതിക വിദ്യയുടെ അടയാളങ്ങൾ കാണാനാകും. ഇപ്പോഴിതാ ആദ്യമായി ഒരു സ്കൂളിന്റെ പ്രിൻസിപ്പാളായി ഒരു എഐ റോബോട്ടിനെ നിയമിച്ചിരിക്കുകയാണ് യുകെയിലെ ഒരു സ്കൂൾ.
യുകെയിലെ വെസ്റ്റ് സസെക്സിലെ ബോർഡിംഗ് പ്രെപ്പ് സ്കൂളായ കോട്ടെസ്മോർ സ്കൂളാണ് എഐ ബോട്ടിനെ പ്രധാന അദ്ധ്യാപകനായി നിയമിച്ചിരിക്കുന്നത്. അബിഗെയ്ൽ ബെയ്ലി എന്ന എഐ ബോട്ട് സ്കൂളിലെ പ്രധാന അദ്ധ്യാപകനായ ടോം റോജേഴ്സനെ സഹായിക്കുന്നതിനായി രൂപകൽപ്പന ചെയ്തതാണ്. സഹപ്രവർത്തകരെ ഏത് രീതിയിൽ സഹായിക്കാം എന്നതിനെ സംബന്ധിച്ച് നിർദ്ദേശങ്ങൾ നൽകുന്നതിൽ തുടങ്ങി, പഠന വൈകല്യം നേരിടുന്ന വിദ്യാർത്ഥികളെ സഹായിക്കുക, സ്കൂൾ ക്രമങ്ങൾ ചിട്ടപ്പെടുത്തുക തുടങ്ങിയ വിഷയങ്ങളിലും തന്നെ റോബോർട്ട് സഹായിക്കുന്നുണ്ടെന്ന് റോജേഴ്സൺ പറയുന്നു.
ഇനി മുതൽ സ്കൂളിൽ പ്രധാന അദ്ധ്യാപകൻ ഇല്ലാത്ത സന്ദർഭങ്ങളിൽ നിർണായക തീരുമാനങ്ങൾ എടുക്കുന്നതും ഉപദേശങ്ങൾ നൽകുകയും ചെയ്യുന്നത് അബിഗെയ്ൽ ബെയ്ലി ആയിരിക്കും. മെഷീൻ ലേണിംഗ്, എഡ്യൂക്കേഷൻ മാനേജ്മെന്റ് എന്നിവയിൽ അറിവ് നേടുന്നതിന് വേണ്ടിയാണ് എഐ പ്രിൻസിപ്പാളിനെ വികസിപ്പിച്ചിരിക്കുന്നത്. കൂടാതെ ഡാറ്റ വിശകലനം ചെയ്യുന്നതിലും ഇത് നിർണായക പങ്കുവഹിക്കുന്നു.