കൊല്ലം: പോലീസ് സ്റ്റേഷനിൽ മദ്യപിച്ച് ബഹളമുണ്ടാക്കിയ നടൻ വിനായകന്റെ പ്രവൃത്തിയെ നിസാരവൽക്കരിച്ച് മന്ത്രി സജി ചെറിയാൻ. വിനായകൻ ഒരു കലാകാരൻ ആണെന്നും പോലീസ് സ്റ്റേഷനിൽ നടന്നത് ഒരു കലാപ്രവർത്തനമായി കണ്ടാൽ മതിയെന്നുമാണ് മന്ത്രിയുടെ പ്രതികരണം. എറണാകുളം നോർത്ത് സ്റ്റേഷനിൽ നടനും പോലീസും തമ്മിലുണ്ടായ വാക്കു തർക്കത്തെപ്പറ്റിയുള്ള മാദ്ധ്യമ പ്രവർത്തകരുടെ ചോദ്യത്തിന് മറുപടി നൽകുകയായിരുന്നു സജി ചെറിയാൻ.
‘വിനായകൻ ഒരു കലാകാരനാണ്. അത് കലാപ്രവർത്തനമായി കണ്ടാൽ മതി. പ്രത്യേകിച്ച് അതിൽ ഒരു അഭിപ്രായ പ്രകടനം നടത്തേണ്ട ആവശ്യമില്ല. കലാകാരന്മാർക്ക് എപ്പോഴും ഇടയ്‌ക്കിടക്ക് കലാപ്രവർത്തനം വരും. അത് പോലീസ് സ്റ്റേഷനിൽ ആയിപ്പോയെന്നേ ഉള്ളൂ. നമ്മൾ അതിൽ സങ്കടപ്പെട്ടിട്ട് കാര്യമൊന്നുമില്ല’- മന്ത്രി പറഞ്ഞു.
