യുജിസി നാഷണൽ എലിജിബിലിറ്റി ടെസ്റ്റിനുള്ള അപേക്ഷാ തീയതി ഒക്ടോബർ 30 വരെ നീട്ടി. അസിസ്റ്റന്റ് പ്രൊഫസർ, ഗവേഷക ഫെലോഷിപ്പുകൾ എന്നിവക്കുള്ള യോഗ്യതാ പരീക്ഷയാണ് നാഷണൽ എലിജിബിലിറ്റി ടെസ്റ്റ് അഥവാ യുജിസി നെറ്റ്. നവംബർ ഒന്ന് മുതൽ മൂന്ന് വരെയാണ് തെറ്റ് തിരുത്തുവാനുള്ള അവസരം. ഡിസംബർ ആറ് മുതൽ 22 വരെ 83 വിഷയങ്ങളിലായി വിവിധ കേന്ദ്രങ്ങളിൽ പരീക്ഷ നടക്കും.
അപേക്ഷാർത്ഥികൾക്ക് ഒന്നിലേറെ വിഷയങ്ങളിൽ അപേക്ഷിക്കുവാൻ കഴിയില്ല. ജനറൽ കാറ്റഗറിയിൽ പെടുന്നവർക്ക് 1150 രൂപയും പിന്നാക്ക വിഭാഗം, സാമ്പത്തിക പിന്നാക്ക വിഭാഗം എന്നിവർക്ക് 600 രൂപയുമാണ് പരീക്ഷാ അപേക്ഷാ ഫീസ്.
55 ശതമാനം മാർക്കോടെ ബിരുദാനന്തര ബിരുദമാണ് യോഗ്യത. പിന്നാക്ക, പട്ടിക, ഭിന്നശേഷി, ട്രാൻസ്‌ജെൻഡർ വിഭാഗങ്ങൾക്ക് 50 ശതമാനം മാർക്ക് മതിയാവും. അവസാന വർഷ ബിരുദാനന്തര ബിരുദ വിദ്യാർത്ഥികൾക്കും അപേക്ഷിക്കാനാവും. രണ്ട് പേപ്പറുകളിലായി 300 മാർക്കിനാണ് പരീക്ഷ. ഒന്നാം പേപ്പറിന് 100 മാർക്കും രണ്ടാം പേപ്പറിന് 200 മാർക്കും ഉണ്ടാവും. നെഗറ്റീവ് മാർക്കില്ല.
