പ്ലൂട്ടോ.. സൗരയൂഥത്തിൽ ഒമ്പതാമനായി നിറഞ്ഞുനിന്നിരുന്ന താരം. എന്നാൽ പെട്ടെന്നൊരു ദിവസം അവൻ സൗരയൂഥത്തിൽ നിന്ന് പുറത്തായി. ഒപ്പം പാഠപുസ്തകങ്ങളിൽ നിന്നും.. കുഞ്ഞനാണെന്ന ഒറ്റ കാരണത്താൽ ഗ്രഹമെന്ന സ്ഥാനം നഷ്ടപ്പെട്ടവനാണ് പ്ലൂട്ടോ. എന്നിരുന്നാലും ഭൂമിയിലെ മനുഷ്യർക്കിടയിൽ മാത്രമാണ് പ്ലൂട്ടോ ഒരു ഗ്രഹമല്ലാതായി മാറിയത്. കുഞ്ഞനാണെങ്കിലും അവൻ ഇപ്പോഴും അവിടെ തന്നെയുണ്ട്. അതുകൊണ്ട് പ്ലൂട്ടോയെക്കുറിച്ചുള്ള പഠനങ്ങളും ഗവേഷണങ്ങളും ലോകത്തിന്റെ പലഭാഗത്തും പുരോഗമിക്കുകയാണ്.
പ്ലൂട്ടോയുടെ വ്യക്തവും സൂക്ഷ്മവുമായ ചിത്രമാണ് ഇപ്പോൾ നാസ പങ്കുവച്ചിരിക്കുന്നത്. കഴിഞ്ഞ പത്ത് വർഷത്തിനിടെ ഇത്രമാത്രം തെളിച്ചമുള്ള ഒരു പ്ലൂട്ടോചിത്രം ഈ ലോകത്തിന് ലഭിച്ചിട്ടില്ല. നാസയുടെ ന്യൂ ഹോറിസോൺ സ്‌പേസ്‌ക്രാഫ്റ്റാണ് ചിത്രം പകർത്തിയിരിക്കുന്നത്. ന്യൂ ഹോറിസോണിൽ നിന്ന് ലഭിച്ച ചിത്രങ്ങളും വിവരങ്ങളും നിലവിൽ വിശകലനം ചെയ്യുകയാണ് ഗവേഷകർ. ഇതിനിടെയാണ് പുത്തനൊരു ‘അഗ്നി’പർവ്വതം പ്ലൂട്ടോയിൽ നിന്നും ശാസ്ത്രലോകം കണ്ടെത്തിയത്. പക്ഷെ ഈ ‘അഗ്നി’പർവ്വതത്തിന് ഒരു പ്രത്യേകതയുണ്ട്. പർവ്വതത്തിനുള്ളിൽ നിന്നും പുറത്തേക്കൊഴുകുന്നത് ലാവയല്ല. മറിച്ച് ഐസും വെള്ളവുമാണ്. പുതിയതായി കണ്ടെത്തിയ ഈ ‘അഗ്നി’പർവ്വതത്തിന് കിലാഡ്‌സെ കാൽഡേറ എന്നാണ് പേരിട്ടിരിക്കുന്നത്.
കിലാഡ്‌സെ കാൽഡേറ മുമ്പും കണ്ടെത്തിയിട്ടുണ്ടെങ്കിലും അതൊരു ഐസ്പർവ്വതമാണെന്ന് തിരിച്ചറിയുന്നത് ഇപ്പോഴാണ്. നേരത്തെ ഇത് ഇംപാക്ട് ക്രാറ്റർ ആണെന്നാണ് ശാസ്ത്രജ്ഞർ ധരിച്ചിരുന്നത്. അതായത് ഗ്രഹത്തിന്റെ ഉപരിതലത്തിൽ വന്ന് പതിക്കപ്പെടുന്ന ഉൽക്കാശില മൂലമുണ്ടാകുന്ന ഘടനയെയാണ് ഇംപാക്ട് ക്രാറ്റർ എന്ന് വിളിക്കുക.
പ്ലൂട്ടോയിൽ കാണുന്നത് ഇംപാക്ട് ക്രാറ്റർ അല്ലെന്ന സംശയം ഒരുസമയത്ത് ശാസ്ത്രജ്ഞർക്ക് അനുഭവപ്പെട്ടിരുന്നു. എന്നാൽ ഇംപാക്ട് ക്രാറ്റർ അല്ലെങ്കിൽ മറ്റെന്ത് എന്ന ചോദ്യത്തിന് ഉത്തരം ലഭിച്ചിരുന്നില്ല. എന്നാൽ പുതിയ വിശകലനങ്ങൾ അതിനെല്ലാം ഉത്തരം നൽകുന്നതാണ്. കിലാഡ്‌സെ കാൽഡേറ എന്ന ഈ ഐസ് പർവ്വതം രൂപപ്പെട്ടിട്ട് അധികം വർഷമായിട്ടില്ലെന്നാണ് മറ്റൊരു കണ്ടെത്തൽ. കാരണം പർവ്വതത്തിന് ചുറ്റുഭാഗത്ത് ഇപ്പോഴും വാട്ടർഐസ് കാണാൻ സാധിക്കും. അതായത് പർവ്വതം പൊട്ടിത്തെറിച്ചത് സമീപകാലത്താണെന്നാണ് ഇത് സൂചിപ്പിക്കുന്നത്. പ്ലൂട്ടോയിലെ മറ്റിടങ്ങളിലും സമാനമായ ഐസ് പർവ്വതങ്ങളുണ്ട്. റൈറ്റ് മോൺസ്, പിക്കാർഡോ മോൺസ് എന്നിവയാണത്.
