ചെറുത്തു നിൽപ്പിന്റെ പല വീറുറ്റ കഥകൾ നാം കണ്ടിട്ടുണ്ട്. ജീവൻമരണ പോരാട്ടത്തിനിടയിൽ ആക്രമിച്ച മുതലയുടെ കൺപോളകളിൽ കടിക്കാൻ നിങ്ങൾക്ക് ധൈര്യമുണ്ടോ? എന്നാൽ അങ്ങനെ ധൈര്യമുണ്ടായ ഒരാളുണ്ട്. സംഭവം അങ്ങ് ഓസ്ട്രേലിയയിലാണ്.
എബിസി ന്യൂസ് റിപ്പോർട്ട് പ്രകാരം ഓസ്ട്രേലിയൻ സ്വദേശിയായ കോളിൻ ഡെവെറോക്സ് ആണ് മുതലയുടെ ആക്രമണത്തെ ചെറുത്തു തോൽപ്പിച്ചത്. കർഷകനായ കോളിൻ ഫിന്നസ് നദിയ്ക്ക് സമീപം വേലിക്കെട്ടുന്നതിനിടയായിരുന്നു മുതലയുടെ ആക്രമണത്തിന് ഇരയായത്. നദിയിലൂടെ വേഗത്തിൽ നീന്തി വന്ന മുതല കോളിന്റെ കാലിൽ കടിച്ചു.
ആദ്യം മുതലയുടെ വായയിൽ നിന്നും കാൽ വലിച്ചെടുക്കാൻ ശ്രമിച്ചെങ്കിലും പരാജയപ്പെടുകയായിരുന്നു. പിന്നീട് ജീവൻ മരണ പോരാട്ടത്തിനിടയിൽ അതിജീവനത്തിനായി മുതലയെ തിരിച്ച് കടിക്കാൻ തീരുമാനിക്കുകയായിരുന്നെന്ന് കോളിൻ പറഞ്ഞു. തുടർന്ന് മുതലയുടെ കൺപോളകളിൽ കടിക്കുകയും അതിന്റെ വായയിൽ നിന്നും രക്ഷപ്പെടുകയുമായിരുവെന്നും കോളിൻ വ്യക്തമാക്കി.
കാലിൽ ഗുരുതരമായി പരിക്കേറ്റ കോളിനെ ഉടനെ തൊട്ടടുത്തുള്ള ആശുപത്രിയിലേക്ക് മാറ്റി. മുതലയുടെ വായയിൽ നിന്നും തലനാരിഴയ്ക്കാണ് ജീവൻ രക്ഷിക്കാൻ കഴിഞ്ഞതെന്നും ഓസ്ട്രേലിയയിലെ ഭരണാധികാരികൾ ഇനിയെങ്കിലും കണ്ണ് തുറക്കണമെന്നും കോളിൻ അഭിപ്രായപ്പെട്ടു. ഓസ്ട്രേലിയൻ ഭരണകൂടത്തിന്റെ നിയമങ്ങളിൽ മുതലകളെ സംരക്ഷിക്കുന്നതിൽ മുൻഗണന നൽകുന്നു. ഈ ഉരഗവർഗങ്ങളെ ഉപദ്രവിക്കുകയോ കൊലപ്പെടുത്തുകയോ ചെയ്യുന്നത് ശിക്ഷാഹർഹമാണെന്നും കോളിൻ പറഞ്ഞു.
