കോഴിക്കോട്: ഹമാസ് അനുകൂല കൂട്ടായ്മകൾ കോഴിക്കോട് മാത്രം ലക്ഷ്യം വച്ച് നടത്തുന്നതിനെ വിമർശിച്ച് നടൻ ഹരീഷ് പേരടി. രാഷ്ട്രീയ പാർട്ടികളുടെയും പാലസ്തീൻ കൂട്ടായമയ്ക്ക് എന്തിനാണ് എല്ലാവരും കോഴിക്കോട് തിരഞ്ഞെടുക്കുന്നതെന്ന് ഹരീഷ് പേരടി ചോദിച്ചു. കോഴിക്കോട്ടുകാരുടെ മനസുകളിൽ വേലികെട്ടാനുള്ള ശ്രമങ്ങളാണ് നടക്കുന്നതെന്നും വോട്ടിന് വേണ്ടി തെണ്ടുന്ന കള്ളൻമാർക്ക് കോഴിക്കോടിനെ വിട്ടുകൊടുക്കരുതെന്നും നടൻ തുറന്നടിച്ചു.
കോഴിക്കോടും പാലസ്തീനുമായി എന്തെങ്കിലും ചരിത്രപരമായ ബന്ധമോ വ്യാപരബന്ധമോ ഒന്നുമില്ല. പിന്നെയെന്തിനാണ് ഒരുപാട് ആളുകൾ ഒത്തുചേരുന്ന ഒരു പരിപാടി ആവർത്തിച്ച്, ആവർത്തിച്ച് നടത്തി കോഴിക്കോട്ടെ സാധാരണ മനുഷ്യരുടെ ജീവിതം ഗാസയിലെ പോലെയാക്കി നശിപ്പിക്കുന്നത്. ഇത് കേരളത്തെ മുഴുവൻ ബാധിക്കുന്ന പ്രശ്നമായതുകൊണ്ട് ഒരു വെറൈറ്റിക്കെങ്കിലും വേണ്ടി തിരവനന്തപുരമോ തൃശൂരോ പത്തനംതിട്ടയോ കോട്ടയമോ ഒക്കെ ഒന്ന് പരീക്ഷിച്ചു കൂടെ. കേരളീയം, അന്താരാഷ്ട്ര ചലച്ചിത്രോത്സവം, അന്താരാഷട്ര നാടകോത്സവം എന്നിങ്ങനെ എല്ലാ ആഘോഷങ്ങളും കോഴിക്കോടിന് പുറത്ത്. പക്ഷെ, എല്ലാ അന്താരാഷ്ട്ര പ്രതിഷേധങ്ങൾക്കും കോഴിക്കോട് വേണം.
ഉത്തരം വളരെ സിമ്പിളാണ്. നമ്മൾ കോഴിക്കോട്ടുക്കാർ പൊട്ടൻമാരണെന്ന് എല്ലാ രാഷ്ട്രീയ പാർട്ടികളിലേയും ഉന്നത രാഷ്ട്രീയ നേതൃത്വങ്ങൾ വിലയിരുത്തിയിരിക്കുന്നു എന്ന് അർത്ഥം. പ്രിയപ്പെട്ട കോഴിക്കോട്ടുക്കാരെ നമ്മൾ ഇത്രയും കാലം ജാതി മത വ്യത്യാസമില്ലാതെ ഓണവും ക്രിസ്തുമസും പെരുന്നാളും ഒന്നിച്ച് ആഘോഷിച്ചുവരാണ്. അതുകൊണ്ടു തന്നെയാണ് ഇവർ നമ്മുടെ കോഴിക്കോടിനെ ഉന്നം വെയ്ക്കുന്നത്. നമ്മുടെ മനസുകളിൽ വേലികെട്ടാനുള്ള എല്ലാ ശ്രമങ്ങളേയും എതിർക്കുക. യുനസ്ക്കോ അംഗീകരിച്ചവരാണ് നമ്മൾ കോഴിക്കോട്ടുക്കാർ. വിശ്വപൗരന്മാരാണ് നമ്മൾ. ആ അന്തസ്സ് ഉയർത്തി പിടിച്ചേപറ്റു. വോട്ടിന് വേണ്ടി തെണ്ടുന്ന ഒരു കള്ളൻമാർക്കും വിട്ടുകൊടുക്കരുത് നമ്മുടെ നാടിനെ- ഹരീഷ് പേരടി പറഞ്ഞു.
