ടിവി പ്രോഗ്രാമിലൂടെ പ്രേക്ഷകരുടെ മനസിൽ ഇടംനേടിയ താരമാണ് വിൻസി അലോഷ്യസ്. ചുരുക്കം ചില സിനിമകൾ ചെയ്ത് ആരാധകരെ സ്വന്തമാക്കിയ താരത്തിന് സാമൂഹ്യമാദ്ധ്യമങ്ങളിലും ആരാധകർ ഏറെയാണ്. രേഖ എന്ന ചിത്രത്തിലൂടെ അഭിനയത്തിന് വിൻസിയ്‌ക്ക് കഴിഞ്ഞ വർഷത്തെ സംസ്ഥാന അവാർഡ് ലഭിച്ചിരുന്നു. തന്റെ കരിയറിലെ ഏറ്റവും മികച്ച ചിത്രമെന്നാണ് രേഖയെ കുറിച്ച് വിൻസി തന്നെ അഭിപ്രായപ്പെടുന്നത്. ഇപ്പോൾ ചിത്രത്തെ കുറിച്ച് വിൻസി പങ്കുവെച്ച കാര്യങ്ങളാണ് സാമൂഹ്യമാദ്ധ്യമങ്ങളിൽ ശ്രദ്ധേയമാകുന്നത്. അവാർഡ് കിട്ടുന്നത് വരെ ആ പടം ആളുകളിലേക്ക് എത്തിയിട്ടില്ലെന്നാണ് വിൻസി പറയുന്നത്.
നെറ്റ്ഫ്ളിക്സിൽ വന്നിട്ട് പോലും ശ്രദ്ധിക്കപ്പെട്ടില്ലെന്നും കളിച്ച തിയേറ്ററിൽ പോലും പടത്തിന്റെ പോസ്റ്റർ ഇല്ലാത്ത അവസ്ഥയുണ്ടായിട്ടുണ്ടെന്നും വിൻസി പറയുന്നു. കൊറോണയുടെ സമയത്തൊന്നും എനിക്ക് സിനിമയുണ്ടായിരുന്നില്ല. ഒരുപാട് സമയമെടുത്താണ് ഒരു സിനിമ കിട്ടുന്നത്. അതിനിടയിലും ബ്രേക്ക് വന്നു. എല്ലാം അതിന്റേതായ സമയത്ത് നടക്കും എന്നാണ് എനിക്ക് തോന്നുന്നത്. അതുകൊണ്ട് തന്നെ എനിക്ക് അതിൽ വിഷമം ഉണ്ടായിരുന്നില്ല. രേഖയ്‌ക്ക് വേണ്ടി വെറൊരു നായികയെയാണ് തീരുമാനിച്ചിരുന്നത്. എന്നാൽ അവർ വേണ്ടെന്ന് വെച്ചു. എന്നാൽ എനിക്ക് ഈ ചിത്രം ഓക്കെയായി.
കഥ കേട്ടപ്പോൾ തന്നെ എനിക്ക് ഇഷ്ടപ്പെട്ടു. ചിത്രത്തിന്റെ ട്രെയിലർ സിനിമയിലുള്ള പല സുഹൃത്തുക്കളും ഷെയർ ചെയ്തു. എന്നിട്ടും അത് ആൾക്കാരിലേക്ക് എത്തിയില്ല. അത് തന്നെ വല്ലാതെ തളർത്തിയെന്നും എന്നാൽ സംസ്ഥാന അവാർഡ് നേടിയപ്പോൾ എല്ലാവരും സിനിമ കണ്ടെന്നും വിൻസി പറയുന്നു.
