തൃശൂർ: ജനങ്ങളോടൊത്തുള്ള തൃശൂരിന്റെ വികസന ചർച്ചകൾ തുടർന്ന് സുരേഷ് ഗോപി. എസ്ജി കോഫീ ടൈം എന്ന പരിപാടിയിലൂടെയാണ് വികസന ചർച്ചകൾ നടത്തുന്നത്. ഒരു കോഫീ കുടിക്കുന്നതിനോടൊപ്പം സൗഹൃദ സംഭാഷണവും വികസന ചർച്ചകളുമാണ് താരവുമൊത്ത് ജനങ്ങൾ പങ്കിടുന്നത്. ഭാവിയിൽ ജനങ്ങളുടെ അഭിപ്രായങ്ങളും വികസന കാഴ്ചപ്പാടുകളും ക്രോഡീകരിച്ചുള്ള പവർത്തനമാണ് പരിപാടിയിലൂടെ ലക്ഷ്യം വെക്കുന്നത്.
രാഷ്ട്രീയത്തിനപ്പുറമുള്ള വികസന കാഴ്ചപ്പാടുകൾ ചർച്ച ചെയ്ത് അതിന് കൃത്യമായ പരിഹാരം കാണുകയാണ് തന്റെ ലക്ഷ്യമെന്ന് സുരേഷ് ഗോപി പറഞ്ഞു. ചർച്ചകളിൽ ഉയർന്നുവന്ന ജനങ്ങളുടെ അഭിപ്രായങ്ങൾക്കും താരം മറുപടി നൽകി.
കഴിഞ്ഞദിവസം ഒല്ലൂരിൽ നടന്ന എസ്ജി കോഫീ ടൈമിൽ നിരവധിപേർ പങ്കെടുത്തു പരിപാടിയിൽ ബിജെപി ജില്ലാ അദ്ധ്യക്ഷൻ അഡ്വ. കെ കെ അനീഷ് കുമാർ അടക്കമുള്ള നേതാക്കളും പങ്കുചേർന്നു. ഒല്ലൂർ എടക്കുന്നിയിലും പുഴയോരം ഗാർഡൻസിലും താരത്തിനൊപ്പം സായാഹ്ന ചർച്ചയിൽ പങ്കെടുക്കാൻ നിരവധി ജനങ്ങളാണ് എത്തിച്ചേർന്നത്. പരിപാടിയിൽ ഒല്ലൂരിലെ ജനങ്ങൾക്ക് പറയാൻ ഒരുപാട് കാര്യങ്ങൾ ഉണ്ടായിരുന്നു. വികസനം വാക്കുകളിൽ മാത്രം ഒതുക്കുന്ന ഇടത് വലത് മുന്നണികൾ കണ്ടില്ലെന്ന് നടിക്കുന്ന പല കാര്യങ്ങളും ജനങ്ങൾ സുരേഷ് ഗോപിയോട് പങ്കു വെച്ചു.
അതേസമയം തൃശൂരിലെ ഓട്ടോറിക്ഷ തൊഴിലാളികളോടൊത്തുള്ള സുരേഷ് ഗോപിയുടെ വികസന ചർച്ചകളും ശ്രദ്ധേയമായിരുന്നു. രാഷ്‌ട്രീയത്തിനതീതമായ ചർച്ചകൾക്കായി തൃശൂരിന്റെ വിവിധ മേഖലകളിൽ സഞ്ചരിച്ച് സുരേഷ് ഗോപി തന്നെയാണ് കോഫീ ടൈമിന് നേതൃത്വം നൽകുന്നത്.
