കന്നട സിനിമയിൽ ഈ അടുത്ത് ഇറങ്ങിയ ഹിറ്റ് ചിത്രമായിരുന്നു സപ്തസാഗര ദാച്ചേ എല്ലോ സൈഡ് എ. കന്നഡ യുവതാരം രക്ഷിത് ഷെട്ടിയായിരുന്നു ചിത്രത്തിലെ നായകൻ. സൈഡ് എ, സൈഡ് ബി, എന്നിങ്ങനെയാണ് ചിത്രത്തിന്റെ റിലീസ് തീരുമാനിച്ചത്. ഇതിൽ സൈഡ് എ സെപ്റ്റംബർ ഒന്നിന് തിയറ്ററുകളിൽ എത്തി. ആഴ്ചകൾക്ക് ശേഷം ചത്രത്തിന്റെ രണ്ടാം ഭാഗം റിലീസിന് തയ്യാറെടുക്കുകയാണ്. 17 ന് ചിത്രം തിറ്ററുകളിലെത്തും. നിലവിൽ ചിത്രത്തിന്റെ പ്രമോഷൻ പരിപാടികൾ പുരോഗമിച്ചുകൊണ്ടിരിക്കുകയാണ്.
സപ്തസാഗര ദാച്ചേ എല്ലോ സൈഡ് ബി യുടെ പ്രൊമോഷന്റെ ഭാഗമായി ചിത്രത്തിലെ നായകൻ രക്ഷിത് ഷെട്ടിയും നായികയായ ചൈത്രാ ആചാറും കൊച്ചിയിലെ സ്വകാര്യ ഹോട്ടലിൽ നടന്ന വാർത്താ സമ്മേളനത്തിൽ പങ്കെടുത്തു. 777 ചാർലി എന്ന ചിത്രത്തിന് കേരളത്തിൽ നിന്നും കിട്ടിയ വലിയ സ്വീകാര്യതക്ക് രക്ഷിത് ഷെട്ടി നന്ദി അറിയിച്ചു. ഒടിടിയിൽ റിലീസ് ആയ സപ്ത സാഗര ദാച്ചേ എല്ലോ മലയാളം പതിപ്പ് മികച്ച പ്രേക്ഷക പ്രതികരണം നേടി. പ്രേക്ഷകന് പൂർണ്ണമായും തിയേറ്റർ എക്‌സ്പീരിയൻസ് ലഭിക്കുന്ന ചിത്രമായിരിക്കും സപ്ത സാഗര ദാച്ചേ എല്ലോ സൈഡ് ബി എന്നും രക്ഷിത് അഭിപ്രായപ്പെട്ടു. ടോബി എന്ന ചിത്രത്തിന് കേരളത്തിൽ നിന്ന് കിട്ടിയ വൻ സ്വീകാര്യതയ്‌ക്ക് നടി ചൈത്രാ ആചാർ നന്ദി പ്രകടിപ്പിച്ചു.
‘വീഡിയോ റിവ്യൂകൾ പലപ്പോഴും സിനിമയെ ബാധിക്കാറുണ്ട്, എഴുത്തുകൾ ആയി വരുന്ന റിവ്യൂകൾ ആവശ്യമുള്ളവർ മാത്രം പോയി വായിക്കുകയും വീഡിയോ റിവ്യൂകളിൽ പലപ്പോഴും സിനിമയുടെ കാതലായ വശങ്ങളും കഥാംശങ്ങളും വെളിപ്പെടുത്തി അത് റീൽ ആയി ഷെയർ ചെയ്യപ്പെടുമ്പോൾ സിനിമയെ അത് ബാധിക്കാറുണ്ടെന്നും രക്ഷിത് പറഞ്ഞു. റിവ്യൂകൾ സിനിമയെ എത്തരത്തിൽ ബാധിക്കും എന്ന് മാദ്ധ്യമ പ്രവർത്തകന്റെ ചോദ്യത്തിന് മറുപടിയായി അദ്ദേഹം പറഞ്ഞു.
സപ്ത സാഗരദാച്ചേ എല്ലോ നവംബർ 17 ന് കേരളത്തിൽ എത്തിക്കുന്നത് പൃഥ്വിരാജ് പ്രൊഡക്ഷൻസ് ആണ്. ചിത്രം ലിസ്റ്റിൻ സ്റ്റീഫന്റെ മാജിക് ഫ്രെയിംസാണ് വിതരണം ചെയ്യുന്നത്. സപ്ത സാഗരദാച്ചേ എല്ലോ സൈഡ് ബി മലയാളം ട്രെയ്‌ലറിനും മികച്ച സ്വീകാര്യതയാണ് ലഭിച്ചത്. ഒരു മില്യണിൽ പരം കാഴ്ചക്കാരാണ് ചിത്രത്തിന്റെ ട്രെയ്‌ലറിന് ഇതുവരെ ലഭിച്ചത്. സിനിമയിലെ ആദ്യ ഭാഗം ആമസോൺ പ്രൈമിൽ മലയാളത്തിൽ ലഭ്യമാണെന്നും കാണാത്തവർ സൈഡ് ബി കാണുന്നതിന് മുന്നോടിയായി സപ്ത സാഗരദാച്ചേ എല്ലൊ സൈഡ് എ കാണമെന്നും രക്ഷിത് ഷെട്ടി അഭ്യർത്ഥിച്ചു.
പരംവാഹ് പിക്‌ചേഴ്‌സിന്റെ ബാനറിൽ രക്ഷിത് ഷെട്ടി തന്നെയാണ് ചിത്രത്തിന്റെ നിർമ്മാണം. ഹേമന്ത് എം. റാവു രചനയും സംവിധാനവും നിർവഹിച്ച ചിത്രത്തിൽ രക്ഷിത് ഷെട്ടി, രുക്മിണി വസന്ത്, ചൈത്ര ജെ. ആചാർ എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്. സംഗീതം ചരൺ രാജ്, ഛായാഗ്രഹണം അദ്വൈത ഗുരുമൂർത്തി, എഡിറ്റിംഗ് സുനിൽ എസ്. ഭരദ്വാജ്, തിരക്കഥ ഹേമന്ത് എം. റാവു,ഗുണ്ടു ഷെട്ടി, ശബ്ദ മിശ്രണം എം.ആർ.രാജാകൃഷ്ണൻ, ആർട്ട് ഡയറക്ടർ ഉല്ലാസ് ഹൈദൂർ എന്നിവർ നിർവ്വഹിക്കുന്നു.പി ആർ ഓ പ്രതീഷ് ശേഖർ.
