മുംബൈ: ന്യൂസിലൻഡിനെ 70 റൺസിന് തകർത്തെറിഞ്ഞാണ് ഹിറ്റ്മാനും സംഘവും ലോകകപ്പ് ഫൈനലിന് ടിക്കറ്റെടുത്തത്. 2019-ലെ ലോകകപ്പ് സെമിഫൈനലിൽ ന്യൂസിലൻഡിനോട് 18 റൺസിന് പരാജയപ്പെട്ടത്തിന്റെ മധുരപ്രതികാരം കൂടിയാണ് വാങ്കഡെയിലെ വിജയം. ടോസ് നേടി ബാറ്റിംഗ് തിരഞ്ഞെടുത്ത ഇന്ത്യ 397 റൺസാണ് അടിച്ചുകൂട്ടിയത്. വിരാട് കോഹ്‌ലി(117), ശ്രേയസ് അയ്യർ (105), ശുഭ്മാൻ ഗിൽ (80) എന്നിവരുടെ പ്രകടനത്തിലൂടെയാണ് ഇന്ത്യ മികച്ച സ്‌കോർ പടുത്തുയർത്തിയത്. 9.5 ഓവറിൽ 57 റൺസ് വഴങ്ങി ഏഴ് വിക്കറ്റ് വീഴ്‌ത്തിയ മുഹമ്മദ് ഷമിയാണ് കിവീസിന്റെ നട്ടെല്ലൊടിച്ചത്. ഈ ലോകകപ്പിൽ ഇത് മൂന്നാം തവണയാണ് ഷമി അഞ്ച് വിക്കറ്റ് നേട്ടം സ്വന്തമാക്കുന്നത്. ഇതോടൊപ്പം ലോകകപ്പിൽ 50 വിക്കറ്റുകളെന്ന നേട്ടവും ഷമി സ്വന്തം പേരിലാക്കി. ഏറ്റവും കുറഞ്ഞ ഇന്നിംഗ്സുകളിൽ നിന്ന് ഈ നേട്ടത്തിലെത്തുന്ന താരമാണ് ഷമി.
എന്നാൽ ഷമിയുടെ ഈ നേട്ടം മത്സരത്തിന് മുമ്പേ അറിഞ്ഞ ഒരു വ്യക്തിയുണ്ട്. സമൂഹമാദ്ധ്യമങ്ങളിൽ ആ പോസ്റ്റും വൈറലാണ്. ഇന്ത്യ- ന്യൂസിലൻഡ് സെമി പോരാട്ടത്തിന് ഒരു ദിവസം മുമ്പാണ് ഷമിയുടെ ഈ നേട്ടം സ്വപ്നം കണ്ടതായി എക്സിൽ ഡാൻ മാറ്റിയോ എന്നയാൾ ട്വീറ്റ് ചെയ്തത്. സെമിയിൽ ഷമി ഏഴു വിക്കറ്റ് നേടുമെന്ന് താൻ സ്വപ്നം കണ്ടതായാണ് 14-ാം തീയതി ഇയാൾ ട്വീറ്റ് ചെയ്തത്. കീവിസിന്റെ ചിറകരിയുന്നതിൽ നിർണ്ണായക പങ്ക് വഹിക്കാൻ ഷമിയുടെ ഈ ഏഴ് വിക്കറ്റിന് കഴിഞ്ഞതോടെ ഡാനിന്റെ ട്വീറ്റും സമൂഹമാദ്ധ്യമങ്ങളിൽ വൈറലായി. ആരാധകരുടെ വ്യത്യസ്തമായ കമന്റുകളും പോസ്റ്റിന് താഴെയുണ്ട്. നന്നായി ഒന്ന് ഉറങ്ങി നമ്മൾ ഫൈനൽ ജയിക്കുന്നതായി ട്വീറ്റ് ചെയ്യൂ എന്നാണ് ഒരാളുടെ കമന്റ്.
