ഐസ്വാൾ: മ്യാൻമറിലെ അതിർത്തി പ്രദേശങ്ങളിൽ വിമത ഗ്രൂപ്പുകളും സൈനിക ഭരണകൂടവും തമ്മിൽ സംഘർഷം രൂക്ഷമാകുന്നതിനിടയിൽ ഇന്ത്യയിലേക്ക് കടന്ന മ്യാൻമർ സൈനികരെ തിരിച്ചയച്ചു. 75 മ്യാൻമർ സൈനികർ മിസോറാമിലേക്ക് കടന്നതായും അവരെ മ്യാൻമറിലേക്ക് തിരിച്ചയച്ചതായും മിസോറാം ഡിജിപി അനിൽ ശുക്ല പറഞ്ഞു.
മ്യാൻമറിലെ രണ്ട് പ്രധാന സൈനിക ക്യാമ്പുകൾ വിമതർ കീഴടക്കിയിരുന്നു.തുടർന്ന് 75 മ്യാൻമർ സൈനികർ മിസോറാമിലേക്ക് പ്രവേശിച്ചു. പോലീസ് അവരെ രക്ഷപ്പെടുത്തി അസം റൈഫിൾസിന് കൈമാറുകയായിരുന്നു. സേന അവരെ മ്യാൻമറിലേക്ക് തിരിച്ചയച്ചെന്നും അദ്ദേഹം കൂട്ടിച്ചേർത്തു. മ്യാൻമറിന്റെ അതിർത്തി പ്രദേശങ്ങളിൽ അടുത്തിടെ മ്യാൻമർ സൈന്യം നടത്തിയ വ്യോമാക്രമണത്തെ തുടർന്ന് നിരവധി മ്യാൻമർ പൗരന്മാരും അതിർത്തി കടന്ന് മിസോറാമിലെ ചാമ്പായി ജില്ലയിൽ എത്തിയിരുന്നു.
കഴിഞ്ഞ ആഴ്ച, മ്യാൻമറിൽ വിമത സേനയും സൈനിക ഭരണകൂടവും തമ്മിൽ ഒരു വലിയ പോരാട്ടം നടന്നു. വിമതർ ചില പ്രദേശങ്ങൾ കീഴടക്കി. സംഘർഷം കാരണം, സോഖാവത്തറിനടുത്തുള്ള കാവ്‌മോയ് ഗ്രാമത്തിലെ ധാരാളം ഗ്രാമീണർ താൽക്കാലികമായി ഇന്ത്യയിലേക്ക് പാലായനം ചെയ്തിരുന്നു. അന്ന് ഇന്ത്യയിലേക്ക് വന്ന ചിലർക്ക് പരിക്കേറ്റിരുന്നു ഞങ്ങൾ അവരെ ചമ്പായി ആശുപത്രിയിൽ പ്രവേശിപ്പിച്ചു. ചിലരെ ഐസ്വാൾ സിവിൽ ആശുപത്രിയിലേക്കും കൊണ്ടുപോയിട്ടുണ്ട്. സ്ഥിതി ശാന്തമായതിനെ തുടർന്ന് ഭൂരിഭാഗം പേരും തിരിച്ചു പോയി. അതിർത്തിയിൽ മിസോറാം പോലീസും അസം റൈഫിൾസുമായി സംയുക്തമായാണ് പ്രവർത്തിക്കുന്നതെന്നും ഡിജിപി വ്യക്തമാക്കി.
