മമ്മൂട്ടി കമ്പനിക്കൊപ്പം ജോലി ചെയ്യാൻ കഴിഞ്ഞതിൽ സന്തോഷമുണ്ടെന്ന് നടി ജ്യോതിക. ഒരുപാട് നായകന്മാർക്കൊപ്പം അഭിനയിച്ചിട്ടുണ്ടെങ്കിലും മമ്മൂട്ടിയോടൊപ്പം അഭിനയിച്ചത് വളരെ സ്പെഷ്യലാണെന്നും ജ്യോതിക പറഞ്ഞു. വലിയൊരു നിലയിലാണെങ്കിലും അദ്ദേഹം പരീക്ഷണങ്ങൾ ചെയ്യാൻ തയ്യാറാകുന്നുണ്ടെന്നും താരം കൂട്ടിച്ചേർത്തു.
മമ്മൂട്ടിയുടെയും ജ്യോതികയുടെയും പുതിയ ചിത്രമായ കാതല്‍ ദി കോര്‍ സിനിമയുടെ പ്രമോഷനുമായി ബന്ധപ്പെട്ട് മാദ്ധ്യമ പ്രവർത്തകരോട് സംസാരിക്കുകയായിരുന്നു നടി. നായികയായി തന്നെ തിരഞ്ഞെടുത്തതിലുള്ള നന്ദിയും ജ്യോതിക അറിയിച്ചു.
‘മമ്മൂട്ടി കമ്പനിക്കൊപ്പം വര്‍ക്ക് ചെയ്യുന്നതില്‍ വളരെ സന്തോഷമുണ്ട്. കഴിഞ്ഞ ആഴ്ചയാണ് കണ്ണൂര്‍ സ്‌ക്വാഡ് കണ്ടത്. എന്ത് തരം സിനിമയാണ് അവര്‍ നിര്‍മിച്ചിരിക്കുന്നത് എന്ന് അത്ഭുതം തോന്നി.
ഒരു കാര്യം തുറന്ന് പറയുകയാണെങ്കില്‍ ഒരുപാട് ഹീറോസിന്റെ കൂടെ അഭിനയിച്ചിട്ടുണ്ട്. എന്നാല്‍ മമ്മൂട്ടി സാര്‍ വളരെ സ്‌പെഷ്യലായി തോന്നി. വെറുതേ അദ്ദേഹത്തിനൊപ്പം ഇരിക്കുന്നതുകൊണ്ട് പറയുന്നതല്ല. ഇപ്പോള്‍ എത്തിനില്‍ക്കുന്ന ഘട്ടത്തിലും അദ്ദേഹം പരീക്ഷണങ്ങള്‍ ചെയ്യാന്‍ തയാറാണ്. ഒരുപാട് വ്യത്യസ്തമായ സിനികള്‍ ചെയ്യുന്നു. ഇത്ര വലിയ ഘട്ടത്തിലെത്തിയിട്ടും പരീക്ഷണം ചെയ്യുന്നവരാണ് യഥാര്‍ത്ഥ ഹീറോ. ഈ സിനിമയിൽ എന്നെ കാസ്റ്റ് ചെയ്തതിന് വളരെ നന്ദി.’- ജ്യോതിക പറഞ്ഞു.
നവംബര്‍ 23നാണ് കാതല്‍ ദി കോര്‍ തീയേറ്ററുകളിൽ എത്തുന്നത്. മമ്മൂട്ടി കമ്പനിയുടെ ബാനറില്‍ നിര്‍മിച്ച ഈ സിനിമ ദുല്‍ഖര്‍ സല്‍മാന്റെ ഉടമസ്ഥതയിലുള്ള വേഫേറെര്‍ ഫിലിംസാണ് കേരളത്തിൽ വിതരണത്തിനെത്തിക്കുന്നത്.
