ഭുവനേശ്വര്‍: ഇന്ത്യന്‍ ഫുട്‌ബോളിന് പുതു ഉണര്‍വ് പകര്‍ന്ന് ആഴ്‌സണല്‍ ഇതിഹാസം വെങര്‍. ഫിഫയുടെ ആഗോള ഫുട്ബോള് വികസന മേധാവിയുമായ ആഴ്‌സെന്‍ വെങര്‍
മൂന്ന് ദിവസത്തെ സന്ദര്‍ശനത്തിനായി ഇന്ത്യയില്‍ എത്തിയിട്ടുണ്ട്. കഴിവുകളെ കണ്ടെത്തി ഫുട്ബോളിനെ പ്രോത്സാഹിപ്പിക്കാനും വികസിപ്പിക്കുന്നതിനുമായുള്ള പദ്ധതിയുടെ ഭാഗമായാണ് വെംഗര്‍ ഇന്ത്യയിലെത്തിയത്.
പര്യവേക്ഷണം ചെയ്യാന്‍ കാത്തിരിക്കുന്ന ഒരു സ്വര്‍ണ ഖനിയാണ് ഇന്ത്യന്‍ ഫുട്ബോളെന്ന് അദ്ദേഹം വിശേഷിപ്പിച്ചു. ‘ഞാന്‍ എപ്പോഴും ഇന്ത്യയോട് ആകൃഷ്ടനായിരുന്നു. ലോകത്തെ ഫുട്ബോള് മെച്ചപ്പെടുത്തുകയാണ് ലക്ഷ്യം. 1.4 ബില്യണ്‍ വരുന്ന ഇന്ത്യയെപ്പോലുള്ള ഒരു രാജ്യം ഫുട്ബോള് ലോക ഭൂപടത്തില്‍ ഇല്ലയെന്നത് അസാധ്യമാണ്. നമ്മള്‍ നന്നായി പ്രവര്‍ത്തിച്ചാല്‍ ഇവിടെയുള്ള സാധ്യതകള്‍ സങ്കല്‍പ്പിക്കുക. ഇന്ത്യയെ ഫുട്‌ബോളിന്റെ ലോക ഭൂപടത്തില്‍ അടയാളപ്പെടുത്താനാകും. ഞാനും എന്റെ ടീം അതിന് സജ്ജരാണ്. ചെറിയ കാലയളവില്‍ ലക്ഷ്യങ്ങള്‍ കൈവരിക്കണമെന്നാണ് ആഗ്രഹം.
“എന്റെ പ്രധാന ലക്ഷ്യം ഇവിടെ ഒരു സ്വര്‍ണ ഖനി ഉണ്ടെന്ന് ആളുകളെ ബോധ്യപ്പെടുത്തുക എന്നതാണ്, എന്നാല്‍ ഇപ്പോള്‍ അത് പൂര്‍ണമായും പര്യവേക്ഷണം ചെയ്യപ്പെടുകയോ ചൂഷണം ചെയ്യുകയോ പ്രോത്സാഹിപ്പിക്കുകയോ ചെയ്തിട്ടില്ല,”-വെങര്‍ പറഞ്ഞു.
ഭുവനേശ്വറിലെ എഐഎഫ്എഫ്-ഫിഫ അക്കാദമിയുടെ ഉദ്ഘാടനത്തിനായി എത്തിയ അദ്ദേഹം മൂന്നു ദിവസം ഇന്ത്യയില്‍ ഉണ്ടാവും.ഒരു ഫുട്ബോള് രാഷ്‌ട്രമെന്ന നിലയില്‍ മെച്ചപ്പെടാന്‍ ഇന്ത്യയ്‌ക്ക് വലിയ ആസ്തികളും മികച്ച കഴിയുമുണ്ടെന്നും അദ്ദേഹം കൂട്ടിച്ചേര്‍ത്തു.
1996 മുതല്‍ 2018 വരെ ആഴ്‌സണല്‍ ക്ലബിന്റെ മാനേജറായിരുന്നു വെങര്‍. അദ്ദേഹത്തിന് കീഴില്‍ മൂന്ന് പ്രീമിയര്‍ ലീഗ് കിരീടം ഏഴ് എഫ്.എ കപ്പ് തുടര്‍ച്ചയായി 49 മത്സരങ്ങളില്‍ തോല്‍ക്കാതെയുള്ള റെക്കോര്‍ഡും ടീമിനുണ്ട്.
