ബെംഗളുരു: ഇന്ത്യ തദ്ദേശീയമായി നിർമ്മിച്ച തേജസ് യുദ്ധ വിമാനത്തിൽ യാത്ര നടത്തി പ്രധാനമന്ത്രി നരേന്ദ്രമോദി. ബെംഗളുരുവിലെ വ്യോമസേന വിമാനത്താവളത്തിൽ നിന്നും ഇന്ന് രാവിലെയാണ് പ്രധാനമന്ത്രി തേജസിൽ യാത്ര നടത്തിയത്. യാത്രയുടെ ദൃശ്യങ്ങൾ പ്രധാനമന്ത്രി എക്‌സിൽ പങ്കുവെച്ചു.
യാത്രാനുഭവം പങ്കുവക്കാൻ സാധിക്കുന്നതിലും അപ്പുറമാണെന്നും പ്രതിരോധ നിർമ്മാണ രംഗത്തെ രാജ്യത്തിന്റെ കഴിവിലുള്ള തന്റെ വിശ്വാസം ഊട്ടി ഉറപ്പിക്കുന്നതായിരുന്നു സംഭവമെന്നും പ്രധാനമന്ത്രി എക്‌സിൽ കുറിച്ചു. രാജ്യത്തിന്റെ പര്യാപ്തതയിൽ അഭിമാനം പകരുന്നതായിരുന്നു യാത്രയെന്നും അദ്ദേഹം ട്വിറ്ററിൽ കുറിച്ചു.
Successfully completed a sortie on the Tejas. The experience was incredibly enriching, significantly bolstering my confidence in our country's indigenous capabilities, and leaving me with a renewed sense of pride and optimism about our national potential. pic.twitter.com/4aO6Wf9XYO
— Narendra Modi (@narendramodi) November 25, 2023
പൊതുമേഖല സ്ഥാപനമായ ഹിന്ദുസ്ഥാൻ എയ്‌റോനോട്ടിക്‌സാണ് തേജസ് നിർമ്മിക്കുന്നത്. 2001 മുതൽ ഇതുവരെ 50 ൽ അധികം തേജസ് യുദ്ധവിമാനങ്ങൾ എച്ച്എഎൽ വ്യോമസേനയ്‌ക്കായി നിർമ്മിച്ചു നൽകി. 97 പുതിയ തേജസ് വിമാനങ്ങൾക്ക് നിർമ്മിച്ചുനൽകാൻ വ്യോമസേന എച്ച്എഎല്ലിനോട് സെപ്റ്റംബറിൽ നിർദ്ദേശിച്ചിരുന്നു. ഓസ്‌ട്രേലിയ, അർജന്റീന, ശ്രീലങ്ക, ഈജിപ്ത് തുടങ്ങിയ രാജ്യങ്ങളും തേജസ് വാങ്ങാൻ താത്പര്യം പ്രകടിപ്പിച്ച് മുന്നോട്ട് വന്നിട്ടുണ്ട്.
