വെയിലേറ്റാൽ വിറ്റമിൻ ഡി ലഭിക്കുമെന്നാണ് പറയപ്പെടുന്നത്. ഇതുകേട്ട് വെയിലത്ത് നിൽക്കാൻ ഇറങ്ങിപ്പുറപ്പെടുന്നവർ ശ്രദ്ധിക്കേണ്ട കാര്യങ്ങളിതാ..
സൂര്യപ്രകാശത്തിൽ നിന്ന് നമുക്ക് വേണ്ട വിറ്റമിൻ ഡി ധാരാളം ലഭിക്കുമെന്ന് ആരോഗ്യവിദഗ്ധർ പറയുന്നു. ഇതേറ്റുപിടിച്ച് പലരും ഇളംവെയിൽ കായാൻ രാവിലെ പുറത്തിറങ്ങി നിൽക്കാറുമുണ്ട്. എട്ട് മണിക്ക് മുമ്പുള്ള വെയിലാണ് ശരീരത്തിന് ആവശ്യമെന്നും ഇതിൽ നിന്നാണ് വിറ്റമിൻ ഡി ലഭിക്കുകയെന്നുമാണ് ചിലരുടെ വാദം. ഇതുകേട്ട് ഇളംവെയിൽ കൊണ്ടാൽ വിറ്റമിൻ ഡി ലഭിക്കില്ലെന്നതാണ് വാസ്തവമെന്ന് ആരോഗ്യവിദഗ്ധർ വ്യക്തമാക്കുന്നു.
ശരീരത്തിന് അൽപം ചൂട് കിട്ടണമെന്ന് ആഗ്രഹിക്കുകയാണെങ്കിൽ രാവിലെയോ വൈകിട്ടോ ഇളംവെയിൽ കൊള്ളാവുന്നതാണ്. തണുത്തിരിക്കുന്ന ശരീരത്തിന് അൽപം ചൂട് ലഭിക്കുമ്പോൾ കിട്ടുന്ന ഒരു ആശ്വാസം.. അതിന് വേണ്ടി മാത്രം ഈ രീതി പിന്തുടരാം. അതല്ലാതെ, രാവിലെയും വൈകിട്ടും ഇളംവെയിലത്ത് നിന്ന് വിറ്റമിൻ ഡി കരസ്ഥമാക്കാമെന്ന് കരുതേണ്ടെന്നാണ് വൈദ്യശാസ്ത്രം പറയുന്നത്.
ഇന്ത്യയിലെ കാലാവസ്ഥ അനുസരിച്ച് സൂര്യപ്രകാശത്തിൽ നിന്ന് വിറ്റമിൻ ഡി ലഭ്യമാകണമെങ്കിൽ രാവിലെ 9 മണി മുതൽ ഉച്ചയ്‌ക്ക് 1 മണി വരെയുള്ള വെയിലാണ് കൊള്ളേണ്ടത്. മലമ്പ്രദേശത്താണ് നിങ്ങൾ ജീവിക്കുന്നതെങ്കിൽ രാവിലെ 8-9 മണിക്കിടയിലുള്ള സൂര്യപ്രകാശം കൊണ്ടാൽ മതിയാകും. കാരണം അത്തരം മേഖലകളിൽ രാവിലെ തന്നെ ശക്തമായ വെയിൽ ലഭിക്കുന്നു എന്നതുകൊണ്ടാണിത്. എന്നാൽ നിങ്ങൾ താമസിക്കുന്ന സ്ഥലം താരതമ്യേന വെയിൽ കുറവ് ലഭിക്കുന്ന തണുത്ത പ്രദേശമാണെങ്കിൽ ഉച്ചയ്‌ക്ക് ശേഷമുള്ള വെയിലാണ് ശരീരത്തിന് ലഭിക്കേണ്ടത്.
ആഴ്ചയിൽ 4-5 തവണയെങ്കിലും സൂര്യപ്രകാശം നേരിട്ട് ദേഹത്ത് കൊള്ളേണ്ടതുണ്ട് ദിവസവും 10-15 മിനിറ്റ് സമയമെങ്കിലും സൂര്യന്റെ പ്രകാശം ശരീരത്തിന് ലഭിക്കണം. വെയിലിന്റെ കാഠിന്യം കുറവാണെങ്കിൽ മാത്രമേ അതിൽ കൂടുതൽ നേരം സൂര്യപ്രകാശം കൊള്ളേണ്ടതുള്ളൂ.
കൂടുതൽ വെയിൽ കൊണ്ടാൽ അത് ചർമ്മത്തിന് പ്രശ്‌നമുണ്ടാക്കുമെന്ന കാര്യം മറക്കരുത്. നേരിട്ട് വെയിലേൽക്കുമ്പോൾ ശരീരത്തിലെ താപനില വർദ്ധിക്കുകയും പലപ്പോഴും ഇത് സൂര്യാഘാതം ഉണ്ടാകുന്നതിലേക്ക് വഴിവയ്‌ക്കുകയും ചെയ്യും. അമിത സൂര്യപ്രകാശം ശരീരത്തിന് ലഭിച്ചാൽ സ്‌കിൻ കാൻസർ പിടിപെടാനുള്ള സാധ്യതയും ചെറുതല്ല. അതിനാൽ നിങ്ങൾ ജീവിക്കുന്ന പരിതസ്ഥിതിക്ക് അനുയോജ്യമായ വിധത്തിൽ ദിവസവും വെയിൽ കൊള്ളാനാണ് ശ്രമിക്കേണ്ടതെന്ന് പഠനങ്ങൾ വ്യക്തമാക്കുന്നു.
