സിനിമാ പ്രേമികൾ ഏറെ പ്രതീക്ഷയോടെ ഉറ്റുനോക്കുന്ന ചിത്രമാണ് പ്രഭാസ് നായകനായെത്തുന്ന സലാർ. കെജിഎഫ് സീരിസുകൾക്ക് ശേഷം പ്രശാന്ത് നീൽ സംവിധാനം ചെയ്യുന്ന ബ്രഹ്മാണ്ഡ ചിത്രം എന്ന നിലയ്ക്കാണ് ആരാധകരുടെ കാത്തിരിപ്പ്. സലാർ മറ്റൊരു കെജിഎഫ് ആയിരിക്കുമോ എന്ന ചോദ്യവും സിനിമാ പ്രേമികൾ മുന്നോട്ട് വയ്ക്കുന്നു. എന്നാൽ, തന്റെ മുൻ ചിത്രങ്ങളെപ്പോലെയല്ല സലാർ എന്നാണ് സംവിധായകൻ പ്രശാന്ത് നീലിന്റെ വെളിപ്പെടുത്തൽ. സലാർ എങ്ങനെയാണ് മറ്റ് സിനിമകളിൽ നിന്നും വ്യത്യസ്തമാകുന്നതെന്നും അദ്ദേഹം വ്യക്തമാക്കി. ഡിസംബർ ഒന്നിന് സിനിമയുടെ ട്രെയിലർ പുറത്തിറങ്ങും.
‘രണ്ട് സുഹൃത്തുക്കളുടെ കഥയാണ് സലാർ. ഏറ്റവും നല്ല സുഹൃത്തുക്കളായ രണ്ട് പേർ ഏറ്റവും വലിയ ശത്രുക്കളുമാകുന്നു. സൗഹൃദമാണ് സലാറിന്റെ കാതലായ വികാരം. സലാർ: ഒന്നാം ഭാഗത്തിൽ പകുതി കഥയാണ് ഞങ്ങൾ പറയുന്നത്. രണ്ട് സിനിമകളിലൂടെയാണ് ഞങ്ങൾ ഈ രണ്ട് സുഹൃത്തുക്കളുടെ യാത്ര കാണിക്കുന്നത്. ഡിസംബർ ഒന്നിന് ഇറങ്ങുന്ന സലാറിന്റെ ട്രെയിലറിൽ ഞങ്ങൾ സൃഷ്ടിച്ച ലോകത്തിന്റെ ചെറിയ ഒരു രൂപം പ്രേക്ഷകർക്ക് മുന്നിൽ വെളിപ്പെടും’.
‘കെജിഎഫും സലാറും, രണ്ടും വ്യത്യസ്തമായ കഥകളാണ്. കഥ പറയുന്ന ശൈലിയും അതിലെ വികാരങ്ങളും രണ്ട് സിനിമകളിലും വ്യത്യസ്തമാണ്. സലാറിൽ നിന്ന് മറ്റൊരു കെജിഎഫ് പ്രതീക്ഷിക്കരുത്. സലാറിന് അതിന്റേതായ ഒരു ലോകമാണ്. അതിന് അതിന്റേതായ വികാരങ്ങളും കഥാപാത്രങ്ങളും ഉണ്ട്. ആളുകൾ സലാർ ആസ്വദിക്കുമെന്ന് ഞാൻ പ്രതീക്ഷിക്കുന്നു. ആദ്യ രംഗം മുതൽ തന്നെ ഞങ്ങൾ സലാറിന്റെ ടോൺ സെറ്റ് ചെയ്തിട്ടുണ്ട്. സലാറിനൊപ്പം ഒരു കഥയാണ് ഞങ്ങൾ പറയാൻ ഉദ്ദേശിക്കുന്നത്’- ഒരു ചാനലിന് നൽകിയ അഭിമുഖത്തിൽ പ്രശാന്ത് നീൽ പറഞ്ഞു.
