പ്രഭാസിന്റെ ബ്രഹ്മാണ്ഡ ചിത്രം സലാർ ആഗോള ബോക്സോഫീസിൽ റെക്കോർഡ് സ്വന്തമാക്കുമെന്ന പ്രതീക്ഷയിൽ ആരാധകർ. പ്രശാന്ത് നീലിന്റെ സംവിധാനത്തിലൊരുങ്ങിയ ചിത്രത്തിന് പ്രതീക്ഷകൾ ഏറെയാണ്. ഇന്ത്യയില്‍ മാത്രമല്ല യുഎസിലും സലാര്‍ കളക്ഷനില്‍ റെക്കോര്‍ഡുകള്‍ തിരുത്തും എന്നാണ് പുറത്തുവരുന്ന വിവരം. അഡ്വാൻസ് ബുക്കിംഗിൽ ആയാലും വലിയ തോതിൽ പ്രേക്ഷകരെ സ്വന്തമാക്കുകയാണ് സലാർ.
സലാർ നാല് കോടിയോളം നേടിയിരിക്കുന്നു എന്നാണ് ബോക്സോഫീസ് റിപ്പോര്‍ട്ട്. കേരളത്തിലടക്കം സലാര്‍ ആവേശം തീര്‍ക്കുമെന്ന് ഉറപ്പാണ്.
രാജ്യ വ്യാപകമായി റിലീസിനൊരുങ്ങുന്ന ചിത്രത്തിനായി ആരാധകർ കാത്തിരിക്കുകയാണ്. ചിത്രം രണ്ട് ഭാഗങ്ങളായാകും പ്രേക്ഷകരിലേക്ക് എത്തുക. ആദ്യ ഭാഗമായ സലാർ പാർട്ട് 1- സിസ് ഫയർ ഡിസംബർ 22-ന് റിലീസ് ചെയ്യും. പൃഥ്വിരാജ് പ്രൊഡക്ഷൻസും, മാജിക് ഫ്രെയിംസും ചേർന്നാണ് സലാർ കേരളത്തിലെത്തിക്കുന്നത്. ഒടിടി റൈറ്റ്‍സിന് സലാറിന് 160 കോടി രൂപ സലാറിന് ലഭിച്ചു എന്നാണ് ട്രേഡ് അനലിസ്റ്റുകളുടെ റിപ്പോര്‍ട്ട്.
തെന്നിന്ത്യൻ ആക്ഷൻ സൂപ്പർസ്റ്റാർ പ്രഭാസും പൃഥ്വിരാജും ഒന്നിക്കുന്നതുകൊണ്ട് തന്നെ ഇന്ത്യയൊട്ടാകെ ചിത്രത്തിനായുള്ള കാത്തിരിപ്പ് ചെറുതല്ല. രണ്ട് സുഹൃത്തുക്കളുടെ കഥയാണ് സലാർ പറയുന്നത്. ചിത്രത്തിൽ ശ്രുതി ഹാസനാണ് നായികയായെത്തുന്നത്. ആക്ഷന് പ്രധാന്യം നൽകിയിരിക്കുന്ന ചിത്രത്തിൽ പ്രഭാസിനൊപ്പം വരദരാജ മന്നാർ എന്ന കഥാപാത്രത്തെയാണ് പൃഥ്വിരാജ് അവതരിപ്പിക്കുന്നത്. ജഗപതി ബാബു, ഈശ്വരി റാവു, ബോബി സിൻഹ തുടങ്ങിയവരും ചിത്രത്തിൽ പ്രധാന വേഷത്തിൽ എത്തുന്നു. കെജിഎഫിന് ശേഷം പ്രശാന്ത് നീൽ ഒരുക്കുന്ന ആക്ഷൻ ത്രില്ലർ ചിത്രമാണ് സലാർ.
