ഇടുക്കി: ജില്ലയില്‍ ഉപതിരഞ്ഞെടുപ്പിനോടനുബന്ധിച്ച് ഡിസംബര്‍ 12-ന് വാര്‍ഡുകളില്‍ പ്രാദേശിക അവധി പ്രഖ്യാപിച്ച് ജില്ലാ കളക്ടര്‍. ഉടുമ്പന്‍ചോല പഞ്ചായത്തിലെ വാര്‍ഡ് 10, കരിങ്കുന്നം ഗ്രാമപഞ്ചായത്തിലെ വാര്‍ഡ് ഏഴ് എന്നിവിടങ്ങളിലാണ് ഉപതിരഞ്ഞെടുപ്പ് നടക്കുന്നത്. തിരഞ്ഞെടുപ്പ് നടക്കുന്ന വാര്‍ഡുകളിലെ എല്ലാ സര്‍ക്കാര്‍ സ്ഥാപനങ്ങള്‍ക്കും വിദ്യാഭ്യാസ സ്ഥാപനങ്ങള്‍ക്കും അന്നേ ദിവസം അവധിയായിരിക്കുമെന്ന് കളക്ടര്‍ അറിയിച്ചു.
പോളിംഗ് ബൂത്തുകളായി പ്രവര്‍ത്തിക്കുന്ന വിദ്യാഭ്യാസ സ്ഥാപനങ്ങള്‍ക്ക് വോട്ടെടുപ്പിന്റെ തലേന്നും അവധിയായിരിക്കുമെന്ന് ഉത്തരവില്‍ പറയുന്നു. മേല്‍പറഞ്ഞ വാര്‍ഡുകളില്‍ ഡിസംബര്‍ 10-ന് വൈകിട്ട് ആറ് മുതല്‍ 13-ാം തീയതി വരെ എല്ലാ മദ്യ ഷാപ്പുകളും ബീവറേജസ് മദ്യവില്‍പ്പനശാലകളും അടച്ചിടണമെന്നും ഡ്രൈ ഡേ ആചരിക്കണമെന്നും ഉത്തരവില്‍ പരാമര്‍ശിച്ചിട്ടുണ്ട്.
