തിരുവനന്തപുരം:കേരള രാജ്ഭവനിൽ ഈ വർഷത്തെ ക്രിസ്മസ് ആഘോഷം നടന്നു. ഗവർണർ ആരിഫ് മുഹമ്മദ് ഖാനും ക്ഷണിതാക്കളും ചേർന്ന് ക്രിസ്മസ് കേക്ക് മുറിച്ചു. ആദ്ധ്യാത്മിക-രാഷ്‌ട്രീയ-സാമൂഹ്യ- സാംസ്‌കാരിക രംഗത്തെ നിരവധി പ്രമുഖർ ക്രിസ്മസ് ആഘോഷ പരിപാടിയിൽ പങ്കുചേർന്നു. എന്നാൽ ക്ഷണമുണ്ടായിട്ടും മുഖ്യമന്ത്രി പിണറായി വിജയനും മറ്റുമന്ത്രിമാരും പരിപാടിയിൽ പങ്കെടുത്തില്ല.
പരിപാടിയിൽ കേന്ദ്രമന്ത്രി വി. മുരളീധരൻ, ബിജെപി സംസ്ഥാന അദ്ധ്യക്ഷൻ കെ.സുരേന്ദ്രൻ, ചീഫ് സെക്രട്ടറി ഡോ. വി. വേണു, അഡീഷണൽ ചീഫ് സെക്രട്ടറി ശാരദാ മുരളീധരൻ, ബിഷപ്പുമാരായ ബസേലിയോസ് കർദ്ദിനാൾ ക്ലീമ്മിസ് ബാവ, ജോസഫ് മാർ ബാർണബസ്, മാർ ജോസഫ് പെരുംതോട്ടം, കുര്യാക്കോസ് മോർ സേവേറിയസ്, മാത്യൂസ് മോർ സിൽവാനിയോസ്, ഡോ. മോബിൻ മാത്യു കുന്നംപിള്ളി, ശാന്തിഗിരി ഓർഗനൈസിംഗ് സെക്രട്ടറി സ്വാമി ഗുരുരത്നം ജ്ഞാനതപസ്വി, പാളയം ഇമാം ശുഹൈബ് മൗലവി തുടങ്ങിയവർ സന്നിഹിതരായിരുന്നു.
