ഡിസംബർ 22 ന് തീയേറ്ററുകളിൽ എത്തുന്ന ചിത്രത്തിന് വേണ്ടി വമ്പൻ പ്രമോഷനാണ് അണിയറപ്രവർത്തകർ ഒരുക്കുന്നത്. പ്രമോഷന്റെ ഭാഗമായി നടക്കുന്ന അഭിമുഖങ്ങൾക്ക് എസ്.എസ് രാജമൗലിയും എത്തുമെന്നാണ് പുതിയ വിവരം. സംവിധായകൻ പ്രശാന്ത് നീൽ, നടന്മാരായ പ്രഭാസ്, പൃഥ്വിരാജ് എന്നിവരോടൊപ്പം രാജമൗലിയും എത്തുന്ന അഭിമുഖമാണ് അണിയറ പ്രവർത്തകർ ഒരുക്കുന്നത്. നാല് പേരും ഒന്നിച്ചെത്തുന്ന അഭിമുഖം വൈകാതെ പുറത്തുവരുമെന്ന് അറിയിച്ചതോടെ ഇതിനായുള്ള കാത്തിരിപ്പിലാണ് ആരാധകർ.
പ്രഭാസ് നായകനായെത്തുന്ന ബ്രഹ്മാണ്ഡ ചിത്രത്തിന് വേണ്ടി ഏറെ പ്രതീക്ഷയോടെയാണ് ആരാധകർ കാത്തിരിക്കുന്നത്. ഇതുവരെയുള്ള സിനിമാ മേഖലയുടെ കളക്ഷൻ മാറ്റിയെഴുതുന്ന ചിത്രമാണ് സലാറെന്നാണ് ആരാധകരുടെ വിലയിരുത്തൽ. ഇന്ത്യയിൽ മാത്രമല്ല സലാർ റെക്കോർഡുകൾ സ്വന്തമാക്കുമെന്നാണ് പുറത്തുവരുന്ന വിവരം. ചിത്രം രണ്ട് ഭാഗങ്ങളായാകും പ്രേക്ഷകരിലേക്ക് എത്തുന്നത്. ആദ്യ ഭാഗമായ സലാർ പാർട്ട് 1- സീസ് ഫയർ ഡിസംബർ 22-ന് റിലീസ് ചെയ്യും. പൃഥ്വിരാജ് പ്രൊഡക്ഷൻസും, മാജിക് ഫ്രെയിംസും ചേർന്നാണ് സലാർ കേരളത്തിലെത്തിക്കുന്നത്. ഒടിടി റൈറ്റ്‍സിന് 160 കോടി രൂപ സലാറിന് ലഭിച്ചു എന്നാണ് ട്രേഡ് അനലിസ്റ്റുകളുടെ റിപ്പോര്‍ട്ട്.
