ന്യൂഡൽഹി: ഇൻഡി സഖ്യ നേതാക്കളെ വെല്ലുവിളിച്ച് കേന്ദ്രമന്ത്രി ഗിരിരാജ് സിംഗ്. വാരാണസി മണ്ഡലത്തിൽ നിന്നും പ്രധാനമന്ത്രിക്കെതിരെ മത്സരിക്കാനുള്ള ആർജ്ജവം ഏതെങ്കിലും പ്രതിപക്ഷ നേതാക്കൾ കാണിക്കണമെന്ന് അദ്ദേഹം ആവശ്യപ്പെട്ടു. പട്‌നയിൽ മാദ്ധ്യമങ്ങളോട് സംസാരിക്കവെയായിരുന്നു അദ്ദേഹത്തിന്റെ വെല്ലുവിളി.
നിതീഷ് കുമാർ ഉൾപ്പെടെയുളള നേതാക്കൾ നടത്തുന്ന പ്രസ്താവനകൾ യുക്തിക്ക് നിരക്കാത്തതാണ്. ഇൻഡി സഖ്യത്തിലെ മറ്റ് നേതാക്കളും സമാനമാണ്. ബിജെപിയെ നേരിടാൻ തങ്ങൾക്ക് ശക്തിയുണ്ടെന്ന ബോദ്ധ്യമുണ്ടെങ്കിൽ പ്രധാനമന്ത്രി നരേന്ദ്രമോദിക്കെതിരെ വാരാണസിയിൽ നിന്നും മത്സരിച്ച് കാണിക്കാൻ താൻ ഓരോ പ്രതിപക്ഷ നേതാക്കളെയും വെല്ലുവിളിക്കുകയാണ്. ഗിരിരാജ് സിംഗ് പറഞ്ഞു.
മൂന്ന് സംസ്ഥാനങ്ങളിലേക്ക് നടന്ന് നിയമസഭ തിരഞ്ഞെടുപ്പുകളിൽ കോൺഗ്രസ് തകർന്നടിഞ്ഞതിന് പിന്നാലെ പ്രതിപക്ഷ മുന്നണിയുടെ നേതൃസ്ഥാനത്തേക്ക് ഉയരാനാണ് ബിഹാർ മുഖ്യമന്ത്രി നിതീഷ് കുമാർ ശ്രമിക്കുന്നത്. 19 ന് ഡൽഹിയിൽ നടക്കുന്ന ഇൻഡി സഖ്യ യോഗത്തിൽ ഇത്തരം നീക്കം നിതീഷിന്റെ ഭാഗത്തുനിന്നും ഉണ്ടാകുമെന്നാണ് സൂചന. ആർജെഡിയും നിതീഷിനായി യോഗത്തിൽ വാദിക്കുമെന്നാണ് വിവരം.
