തൃശൂര്‍: പത്ര മാദ്ധ്യമങ്ങൾ ഗവർണറുടെ പ്രവൃത്തിയെ ആഘോഷിക്കരുതെന്ന് ഇടതുമുന്നണി കൺവീനർ ഇ പി ജയരാജൻ. കേരളം സംസ്കാരവും വിദ്യാഭ്യാസവും ഉള്ളവരുടെ നാടാണെന്നും കാറിൽ നിന്നും ഇറങ്ങി പ്രതികരിക്കുന്നത് നല്ലതല്ലെന്നും ഇപി ജയരാജൻ പറഞ്ഞു. വിദ്യാർത്ഥികളും യുവാക്കളുമാകുമ്പോൾ അവരുടേതായ പ്രസരിപ്പ് കാണിക്കുമെന്നും എന്നാൽ പ്രായമായവർ ഈ നിലയിൽ പ്രതികരിക്കാൻ പാടില്ലെന്നും ജയരാജൻ പറഞ്ഞു.
‘കേരളത്തിന്റെ ഗവർണർ ഇങ്ങനെയാണോ പ്രവൃത്തിക്കേണ്ടത്. അദ്ദേഹം ഒരു പ്രായമായ നേതാവാണ്. കഴിഞ്ഞ കുറച്ച് ദിവസങ്ങളായി മാദ്ധ്യമങ്ങൾക്ക് മുമ്പിൽ അദ്ദേഹം എന്താണ് പ്രവൃത്തിക്കുന്നത്. അദ്ദേഹത്തെ പറഞ്ഞ് വിടുന്നവരെ ഉപദേശിക്കുന്നതാണ് നല്ലത്. സാമാന്യ ബുദ്ധിക്ക് മനസിലാക്കാൻ കഴിയാത്ത നിലപാടുകളാണ് അദ്ദേഹം സ്വീകരിച്ചിരിക്കുന്നത്. വിദ്യാർത്ഥികളും യുവാക്കളുമാകുമ്പോൾ അവരുടേതായ ചില നിലപാടുകളും പ്രസരിപ്പുമൊക്കെ കാണിക്കും. എന്നാൽ, പ്രായമായ ഭരണകർത്താക്കളും രാഷ്‌ട്രീയക്കാരും ഏറ്റവും നിലവാരം കുറഞ്ഞ നിലയിലേക്ക് പോകരുത്’. ജയരാജൻ മാദ്ധ്യമങ്ങളോട് പറഞ്ഞു.
പത്ര മാദ്ധ്യമങ്ങൾ ഗവർണറുടെ പ്രവൃത്തിയെ ആഘോഷിക്കുകയല്ല ചെയ്യേണ്ടത്, ഇതിനെതിരെ ശക്തമായി പ്രതികരിക്കുകയാണ് വേണ്ടത്. ഇങ്ങനെയാണോ ഒരു ഗവർണർ പെരുമാറേണ്ടത്. ഇതിന് മറുപടി പറയേണ്ടത് ബിജെപിയും കേന്ദ്ര ഗവൺമെന്റുമാണ്. കേരളം സംസ്കാരവും വിദ്യാഭ്യാസവും ഉള്ളവരുടെ നാടാണ്. അവിടെ കാറിൽ നിന്നും ഇറങ്ങി പ്രതികരിക്കുന്നത് നല്ലതല്ലെന്നും ഇ പി ജയരാജൻ പറഞ്ഞു.
