വിനോദ സഞ്ചാരികളും തീർത്ഥാടകരും ഒരിക്കലെങ്കിലും പോകാൻ ആഗ്രഹിക്കുന്ന ഇടങ്ങളാണ് കന്യാകുമാരിയും കാശിയും. കന്യാകുമാരിയ്‌ക്കുള്ള യാത്ര സാധ്യമായെങ്കിൽ കൂടി കാശി യാത്ര മിക്കപ്പോഴും സഫലമാകാറില്ല. യാത്രാ സൗകര്യം തന്നെയാണ് ഇതിന്റെ പ്രധാനകാരണം. ഇനി മുതൽ ഇക്കാര്യത്തിൽ ആശങ്കപ്പെടേണ്ടതില്ല. കന്യാകുമാരിയിൽ നിന്ന് നേരിട്ട് ഇനി ട്രെയിൻ മുഖേന കാശിക്ക് പോകാം. കാശിയ്‌ക്കും കന്യാകുമാരിയ്‌ക്കും ഇടയിൽ സർവീസ് നടത്തുന്ന കാശി തമിഴ് സംഗമം എക്സ്പ്രസ് ഈ കഴിഞ്ഞ ഞായറാഴ്ച മുതൽ സർവീസ് ആരംഭിച്ചു.
നിലവിൽ രണ്ട് ട്രെയിൻ മാറി കയറിയാൽ മാത്രമാണ് കാശിയിൽ എത്താൻ സാധിക്കുക. എന്നാൽ കന്യാകുമാരിയിൽ നിന്നും ട്രെയിനിൽ കയറുകയാണെങ്കിൽ നേരിട്ട് കാശിയിലെത്താം. രാവിലെ കന്യാകുമാരിയിൽ നിന്ന് പുറപ്പെടുന്ന ട്രെയിൻ രണ്ടാം ദിനം രാവിലെ കാശിയിലെത്തും. കന്യാകുമാരി-കാശി, കാശി-കന്യാകുമാരി എന്നീ സർവീസുകളാണ് റെയിൽവേ ഒരുക്കിയിട്ടുള്ളത്. മധുര-തഞ്ചാവൂർ-കാഞ്ചീപുരം-അലഹബാദ്-ബനാറസ്-വാരണാസി എന്നി സ്ഥലങ്ങളിൽ സ്റ്റോപ്പ് അനുവദിച്ചിട്ടുണ്ട്.
ഇനി തുടർച്ചയായി എല്ലാ ആഴ്ചയിലും സർവീസ് ഉണ്ടാകുമെന്ന് റെയിൽവേ അറിയിച്ചു. ബനാറസിൽ നിന്ന് ഡിസംബർ 24 ഞായറാഴ്ച കാശിയിലേക്ക് സർവീസ് ആരംഭിക്കും. കന്യാകുമാരിയിൽ നിന്നും ഡിസംബർ 28-നും സർവീസ് ആരംഭിക്കും. സാധാരണ ട്രെയിൻ സർവീസുകളിലെ നിരക്ക് തന്നെയാകും ഇതിനും ഈടാക്കുക. സ്ലീപ്പറിന് പുറമെ സെക്കൻഡ് എസി, തേർഡ് എസി കോച്ചുകളും ട്രെയിനിലുണ്ട്.
