ന്യൂഡൽഹി: രാജ്യത്ത് കഴിഞ്ഞ അഞ്ച് വർഷത്തിനിടെ 324 കേസുകൾ കേന്ദ്ര സർക്കാർ ദേശീയ അന്വേഷണ ഏജൻസിക്ക് (എൻഐഎ) കൈമാറിയെന്ന് കേന്ദ്ര ആഭ്യന്തര സഹമന്ത്രി നിത്യാനന്ദ് റായ്. രാജ്യസഭാംഗത്തിന് നൽകിയ മറുപടിയിലാണ് അദ്ദേഹം ഇക്കാര്യം അറിയിച്ചത്.
2018 ഡിസംബർ 1 മുതൽ 2023 നവംബർ 30 വരെയുള്ള 324 കേസുകളാണ് എൻഐഎയ്ക്ക് കൈമാറിയത്. കേസുകളുടെ പ്രധാന്യം പരിഗണിച്ചാണ് ഇത്തരത്തിൽ കേസുകൾ കൈമാറിയതെന്നും അദ്ദേഹം പറഞ്ഞു.
കഴിഞ്ഞ അഞ്ച് വർഷത്തിനിടെ 85 കേസുകളിൽ കോടതി വിധി പ്രസ്താവിച്ചു. 81 കേസുകളിലെ പ്രതികൾ ശിക്ഷിക്കപ്പെട്ടു. 2023 നവംബർ വരെ 15 കേസുകളും 2022ൽ 31, 2021ൽ 15, 2020ൽ 9 2019ൽ 19 കേസുകളിലുമാണ് കോടതി വിധി പ്രസ്താവിച്ചത്.
