തിരുവനന്തപുരം: കെഎസ്ആർടിസിയുടെ ഉടമസ്ഥതയിലുള്ള നവകേരള ബസ് ഇനി എന്ത് ചെയ്യണമെന്ന കാര്യത്തിൽ തീരുമാനമായി. പൊതുജനങ്ങൾക്കായി മുഖ്യമന്ത്രിയും മന്ത്രിമാരും സഞ്ചരിച്ച ബസ് തലസ്ഥാനത്ത് ഉൾപ്പെടെ പ്രദർശിപ്പിക്കാനും പിന്നീട് വാടകയ്‌ക്ക് നൽകാനുമാണ് സർക്കാർ തീരുമാനിച്ചിരിക്കുന്നത്. വിവാഹം, വിനോദയാത്ര, തീർത്ഥാടനം തുടങ്ങിയവയ്‌ക്ക് നവകേരള ബസ് വാടകയ്‌ക്ക് ലഭിക്കും.
സിപിഐ സംസ്ഥാന സെക്രട്ടറി കാനം രാജേന്ദ്രന്റെ വിയോഗത്തെ തുടർന്ന് മാറ്റി വച്ച എറണാകുളം ജില്ലയിലെ നവകേരള സദസും പൂർത്തിയായതിന് ശേഷം ബസ് കെഎസ്ആർടിസിയ്‌ക്ക് വിട്ട് നൽകും. സംസ്ഥാനത്ത് സർവ്വീസ് നടത്തുന്ന മറ്റ് ആഡംബര ടൂറിസ്റ്റ് ബസുകളെക്കാൾ കുറഞ്ഞ വാടകയ്‌ക്ക് ആയിരിക്കും നവകേരള സദസ് ബസ് നൽകുക. എന്നാൽ വാടക തുക എത്രയാണെന്ന കാര്യത്തിൽ തീരുമാനമായിട്ടില്ല.
കെഎസ്ആർടിസിയുടെ ബജറ്റ് ടൂറിസം വിഭാഗത്തിന് ബസ് കൈമാറാനാണ് സാധ്യത. ബസ് വാടകയ്‌ക്ക് ലഭിക്കുമോ എന്ന് ചോദിച്ച് 700-ൽ അധികം വ്യക്തികളാണ് കെഎസ്ആർടിസി
അധികൃതരുമായി ബന്ധപ്പെട്ടിട്ടുള്ളത്. 1.15 കോടി രൂപ ചിലവാക്കിയാണ് ഭാരത് ബെൻസിന്റെ ബസ് നവകേരള സദസിനായി സർക്കാർ വാങ്ങിയത്. ശുചിമുറിയുള്ള ബസിൽ 25 പേർക്കുള്ള ഇരിപ്പിടമാണുള്ളത്.
