മലയാളികൾ ഇരുകയ്യും നീട്ടി സ്വീകരിച്ച ഉണ്ണിമുകുന്ദൻ ചിത്രമായിരുന്നു മാളികപ്പുറം. സിനിമ ഇറങ്ങിയിട്ട് ഒരു വർഷം പൂർത്തിയായത് കഴിഞ്ഞ ദിവസമായിരുന്നു. മാളികപ്പുറം ടീം മറ്റൊരു ചിത്രത്തിന് വേണ്ടി വീണ്ടും ഒന്നിക്കുകയാണെന്ന വിശേഷമാണ് ഇപ്പോൾ അണിയറപ്രവർത്തകർ പങ്കുവയ്‌ക്കുന്നത്. തിരക്കഥാകൃത്ത് അഭിലാഷ് പിള്ളയാണ് ഇക്കാര്യം സമൂഹമാദ്ധ്യമത്തിലൂടെ അറിയിച്ചത്.
അഭിലാഷ് പിള്ളയുടെ തിരക്കഥയില്‍ ഒരുങ്ങുന്ന ചിത്രം സംവിധാനം ചെയ്യുന്നത് വിഷ്ണു ശശി ശങ്കര്‍ ആണ്. മാളികപ്പുറത്തിലെ കുട്ടിത്താരമായ ദേവനന്ദയും ഈ സിനിമയുടെ ഭാഗമാണ്. സിനിമയുടെ ചിത്രീകരണം ഉടന്‍ ആരംഭിക്കും. 2024 ഓണത്തിന് തീയേറ്ററില്‍ എത്തിക്കുന്ന തരത്തിലാകും ജോലികള്‍ പൂര്‍ത്തിയാക്കുന്നത്. മുഴുവന്‍ ടീമിനെ കുറിച്ചുള്ള വിവരങ്ങള്‍ വൈകാതെ പ്രഖ്യാപിക്കുമെന്നും ഫേസ്ബുക്ക് പോസ്റ്റിൽ പറയുന്നുണ്ട്.
2022 ഡിസംബർ 30-നാണ് മാളികപ്പുറം തീയേറ്ററിൽ എത്തിയത്. മലയാളത്തിന് പുറമേ തമിഴ്, തെലുങ്ക്, കന്ന‌ട, ഹിന്ദി എന്നീ ഭാഷകളിലും റിലീസ് ചെയ്തിരുന്നു. ബിഗ് സ്ക്രീനിലെ ഗംഭീര വിജയത്തിന് ശേഷം സിനിമ ഒടിടിയിലും ട്രെൻഡിംഗ് ലിസ്റ്റിലും ഇടം നേടിയിരുന്നു.
