ലോകത്ത് ഏറെ ജനപ്രീതിയുള്ള ചൈനീസ് സ്മാർട്ട് ഫോൺ നിർമ്മാണ കമ്പനിയാണ് ഷവോമി. കമ്പനി ഇന്ത്യയിൽ ഏറ്റവും പുതുതായി പുറത്തിറക്കിയ സ്മാർട്ട് ഫോൺ സീരീസാണ് റെഡ്മി 13 സീരീസ്. റെഡ്മി നോട്ട് 13, റെഡ്മി നോട്ട് 13 പ്രോ, റെഡ്മി നോട്ട് 13 പ്രോ പ്ലസ് എന്നീ മൂന്ന് മോഡലുകളാണ് കമ്പനി പുറത്തിറക്കിയത്. റെഡ്മി 13 സീരീസ് ഫോണുകളെല്ലാം 5ജി മോഡലുകളാണ്. കഴിഞ്ഞ വർഷം സെപ്റ്റംബറിൽ ചൈനയിൽ 13 സീരീസ് പുറത്തിറക്കിയിരുന്നു. ജനുവരി 15-ന് നടക്കാൻ ഇരിക്കുന്ന ആഗോള ലോഞ്ചിന് മുന്നോടിയായാണ് ഇന്ത്യയിൽ റെഡ്മി 13 സീരീസ് അവതരിപ്പിച്ചിരിക്കുന്നത്.
കമ്പനി അടുത്തതിടെ തങ്ങളുടെ ഉൽപ്പന്നങ്ങൾക്കായി അവതരിപ്പിച്ചതാണ് ഹൈപ്പർഒഎസ്. MIUI ക്ക് പകരമായാണ് ഹൈപ്പർഒഎസ് പുറത്തിറക്കിയത്. എന്നാൽ പുതിയ റെഡ്മി 13 പ്രോയിൽ ഇത് ലഭ്യമല്ല. ഈ മാസത്തോടെ ഹൈപ്പർഒഎസ് റെഡ്മി സ്മാർട്ട്‌ഫോണുകളിൽ ലഭ്യമാകുമെന്ന് കമ്പനി അറിയിച്ചിരുന്നു. ഉടൻ തന്നെ 13 സീരിസിൽ ഹൈപ്പർഒഎസ് അപ്‌ഡേഷൻ ലഭ്യമാകുമെന്ന് കമ്പനി അറിയിച്ചു.
6 ജിബി റാം/ 12 ജിബി റോം, 8ജിബി റാം/ 256ജിബി റോം, 12 ജിബി റാം/ 256 ജിബി റോം എന്നിങ്ങനെ മൂന്ന് തരത്തിലുള്ള സ്‌റ്റോറേജിലാണ് റെഡ്മി 13 5ജി സീരീസ് ലഭ്യമാവുക. പുതിയ 5ജി സീരീസിൽ 108 എംപിയാണ് ക്യാമറ വരുന്നത്. കൂടാതെ വളരെ ഭാരം കുറഞ്ഞ ബോഡിയും 13 സീരീസിൽ വരുന്നുണ്ട്. 5,000mAh ബാറ്ററിയും 33 വാട്ട് ഫാസ്റ്റ് ചാർജറുമാണ് ഈ സ്മാർട്ട് ഫോണുകൾക്ക് നൽകിയിരിക്കുന്നത്. 6.67 ഇഞ്ചിന്റെ 1.5k ഡിസ്‌പ്ലേയാണ് ഈ സ്‌നാപ്ഡ്രാഗൺ 7s Gen 2 പ്രൊസസറിലുള്ള റെഡ്മി 13 സീരിസിൽ വരുന്നത്.
റെഡ്മി നോട്ട് 13-ന്റെ വില ആരംഭിക്കുന്നത് 16,999 രൂപ മുതലാണ്. റെഡ്മി നോട്ട് 13 പ്രോയുടെ വില 23,999 രൂപ മുതലും റെഡ്മി നോട്ട് 13 പ്രോ പ്ലസ് 29,999 രൂപ മുതലും ആരംഭിക്കും. റെഡ്മി നോട്ട് 13 പ്രോ പ്ലസ് 5ജി സീരീസ് ജനുവരി 10 മുതൽ മാർക്കറ്റിൽ ലഭ്യമാവും.
