കാലിഫോർണിയ: കാലിഫോർണിയയിലെ ഹേവാർഡിലുള്ള വിജയ് ഷെരാവാലി ക്ഷേത്രത്തിന് നേരെ സാമൂഹിക വിരുദ്ധരുടെ ആക്രമണം. ഖാലിസ്ഥാൻ അനുകൂല മുദ്രാവാക്യങ്ങൾ എഴുതിയാണ് ക്ഷേത്രച്ചുവരുകൾ അലങ്കോലമാക്കിയിരിക്കുന്നത്. ഇന്ത്യാ വിരുദ്ധ ചുവരെഴുത്തുകൾ ഉപയോഗിച്ചാണ് ക്ഷേത്രമതിൽ വികൃതമാക്കിയതെന്ന് ഹിന്ദു അമേരിക്കൻ ഫൗണ്ടേഷൻ അറിയിച്ചു. കാലിഫോർണിയയിലെ സ്വാമിനാരായൺ ക്ഷേത്രത്തിന് നേരെ ആക്രമണം നടന്ന് രണ്ടാഴ്ചയ്ക്കുള്ളിലും, സമീപമുള്ള ശിവദുർഗ ക്ഷേത്രത്തിൽ മോഷണം നടന്ന് ഒരാഴ്ചയ്ക്ക് ശേഷവുമാണ് പുതിയ സംഭവവികാസം.
സമൂഹമാദ്ധ്യമങ്ങൾ വഴിയാണ് ഹിന്ദു അമേരിക്കൻ ഫൗണ്ടേഷൻ ക്ഷേത്രത്തിന് നേരെ ആക്രമണം ഉണ്ടായ വിവരം പുറത്ത് വിട്ടത്. ക്ഷേത്ര ഭരണാധികാരികളുമായും, പോലീസ് ഉദ്യോഗസ്ഥരുമായും ബന്ധപ്പെട്ടിട്ടുണ്ടെന്നും ഫൗണ്ടേഷൻ അറിയിച്ചു. കഴിഞ്ഞ മാസം കാലിഫോർണിയയിലെ സ്വാമിനാരായണ ക്ഷേത്രത്തിന് നേരയുണ്ടായ ആക്രമണത്തെ യുഎസ് സ്റ്റേറ്റ് ഡിപ്പാർട്ട്മെന്റ് അപലപിച്ചിരുന്നു. കുറ്റവാളികളെ കണ്ടെത്തി കർശന നടപടിയെടുക്കുമെന്നാണ് നെവാർക്ക് പോലീസ് ഡിപ്പാർട്മെന്റ് അറിയിച്ചത്.
ഇന്ത്യാ വിരുദ്ധ ചുവരെഴുത്തകൾ കൊണ്ട് ക്ഷേത്ര മതിൽ പൂർണമായും വികൃതമാക്കുകയായിരുന്നു. രാവിലെ ക്ഷേത്രദർശനത്തിന് എത്തിയവരാണ് ക്ഷേത്രം വികൃതമാക്കിയത് ശ്രദ്ധിക്കുന്നത്. ഉടൻ തന്നെ ഈ വിവരം പോലീസിനെ അറിയിക്കുകയായിരുന്നു. സംഭവത്തിൽ വിദേശകാര്യമന്ത്രി എസ്.ജയശങ്കർ ആശങ്ക രേഖപ്പെടുത്തിയിരുന്നു. വിഘടനവാദ ശക്തികൾക്കും തീവ്രവാദികൾക്കും സമൂഹത്തിൽ ഇടം നൽകരുതെന്നും അദ്ദേഹം ആവശ്യപ്പെട്ടിരുന്നു.
