ബെംഗളൂരു: തെന്നിന്ത്യൻ നടൻ യഷിന്റെ ജന്മദിനത്തിന് ബാനർ കെട്ടാൻ കയറിയ മൂന്ന് പേർക്ക് ഷോക്കേറ്റ് ദാരുണാന്ത്യം. കർണാടകയിലെ ഗദഗ് ജില്ലയിലെ സുരനാഗിയിൽ ഇന്ന് പുലർച്ചെ ഒരു മണിയോടെയാണ് സംഭവം. ആരാധകരായ ഹനുമന്ത് ഹരിജൻ (24), മുരളി നടുവിനാമണി (20), നവീൻ ഗാജി (20) എന്നിവരാണ് മരിച്ചത്.
സംഭവത്തിൽ രണ്ട് പേർക്ക് കൂടി പരിക്കേറ്റിട്ടുണ്ട്. ഇവർ ലക്ഷ്മേശ്വരിലെ ആശുപത്രിയിൽ ചികിത്സയിൽ കഴിയുകയാണ്. ഇന്ന് യാഷിന്റെ 38-ാം ജന്മദിനം ആഘോഷിക്കുന്നതിന്റെ ഭാഗമായി ഇന്നലെ മുതൽ കർണാടകയിൽ ആരാധകർ പരിപാടികൾ സംഘടിപ്പിച്ചിരുന്നു. ഇതിന്റെ ഭാഗമായി സുരനാഗിയിൽ യഷിന്റെ ആരാധകർ ഫ്ലക്സുകളും കട്ടൗട്ടുകളും സ്ഥാപിക്കാനുള്ള മുന്നൊരുക്കങ്ങൾ നടത്തിയിരുന്നു. ഇതിനിടയിലായിരുന്നു ചരടില് കെട്ടിയ ബാനര് ഹൈ-ടെൻഷൻ വയർ പോകുന്നത് ശ്രദ്ധിക്കാതെ മുകളിലേക്ക് ഉയര്ത്തിയത്. ബാനർ വൈദ്യുത കമ്പിയിൽ സ്പർശിച്ചതോടെ മൂന്ന് ആരാധകര്ക്ക് വൈദ്യുതാഘാതമേൽക്കുകയും ഇവരെ രക്ഷിക്കാൻ ശ്രമിച്ച മറ്റ് രണ്ട് പേർക്കും കൂടി പരിക്കേൽക്കുകയും ചെയ്തത്.
പരിക്കേറ്റ ഉടനെ അഞ്ചുപേരെയും ആശുപത്രിയിലേക്ക് പ്രവേശിപ്പിച്ചെങ്കിലും മൂന്നു പേരുടെ ജീവൻ രക്ഷിക്കാൻ കഴിഞ്ഞില്ല. ഇത്തവണ തന്റെ ജന്മദിനം ആഘോഷിക്കുന്നില്ലെന്ന് യഷ് അറിയിച്ചിട്ടുണ്ട്. ജനുവരി 4-ന് എക്സിൽ പങ്കുവച്ച പോസ്റ്റിൽ ഇത്തവണത്തെ ജന്മദിനത്തിന് ആരാധകരെ കാണാൻ കഴിയില്ലെന്നും താരം അറിയിച്ചിരുന്നു.