മുംബൈ: 27-ാം ദേശീയ യുവോത്സവത്തിന് സമാപനം. മൂന്നാം സ്ഥാനം കരസ്ഥമാക്കി കേരളം. ജനുവരി 12 മുതൽ 16 വരെ മഹരാഷ്‌ട്രയിലെ നാസിക്കിൽ നടന്ന ദേശീയ യുവോത്സവത്തിൽ കേരളത്തിൽ നിന്നും 66 അംഗ സംഘമാണ് പങ്കെടുത്തത്. 28 സംസ്ഥാനങ്ങളിൽ നിന്നും 8 കേന്ദ്രഭരണ പ്രദേങ്ങളിൽ നിന്നുമായി 8000 ത്തോളം പ്രതിഭകളാണ് 8 ഇനങ്ങളിലായി മത്സരിച്ചത്.
ഫോക് സോങ് ഗ്രൂപ്പ് ഒന്നും, ഫോക്ഡാൻസ് ഗ്രുപ്പ് ഇനത്തിൽ രണ്ടും, കഥാരചനയിൽ മൂന്നും സ്ഥാനങ്ങൾ കേരളത്തിനാണ്. ഓവറോൾ ചാമ്പ്യൻഷിപ്പിൽ മഹാരാഷ്‌ട്ര 25 പോയിന്റ് നേടി ഒന്നാം സ്ഥാനം നേടിയപ്പോൾ ഹരിയാന 24 പോയിന്റുമായി രണ്ടാം സ്ഥാനത്തുണ്ട്. 21 പോയിന്റുമായി മൂന്നാം സ്ഥാനത്താണ് കേരളം.
നാസിക്കിലെ ഹനുമാൻ നഗർ യുവഗ്രാമത്തിൽ നടന്ന സമാപന ചടങ്ങിൽ മഹാരാഷ്‌ട്ര കായിക യുവജനകാര്യമന്ത്രി സഞ്ജയ് ബൻസോഡിൽ നിന്ന് ട്രോഫി ഏറ്റുവാങ്ങി.
സംസ്ഥാന യുവജനക്ഷേമ ബോർഡ് മെമ്പർമാരായ ശരീഫ് പാലോളി, സന്തോഷ് കാല, പി.എം. ഷബീറലി, എസ്. ദീപു, മെമ്പർ സെക്രട്ടറി വി.ഡി. പ്രസന്നകുമാർ, പ്രോഗ്രാം ഓഫീസർ വി.എസ്. ബിന്ദു, പ്രോഗ്രാം മാനേജർമാരായ സതീഷ്‌കുമാർ, ദീപു, രഞ്ജിത് എസ്. വേണു എന്നിവരാണ് കേരളാ സംഘത്തെ നയിച്ചത്.
