ന്യൂഡൽഹി: ജനുവരി 26ന് നടക്കുന്ന റിപ്പബ്ലിക് ദിനാഘോഷത്തിൽ ഫ്രഞ്ച് പ്രസിഡന്റ് ഇമ്മാനുവൽ മാക്രോൺ മുഖ്യാതിഥിയാകും. റിപ്പബ്ലിക് ദിനത്തോടനുബന്ധിച്ച് നടക്കുന്ന പരേഡിൽ ഫ്രഞ്ച് സൈന്യത്തിൽ നിന്നുള്ള സംഘവും പങ്കെടുക്കും. പ്രധാനമന്ത്രി നരേന്ദ്രമോദിയുമായി ഇമ്മാനുവൽ മാക്രോൺ കൂടിക്കാഴ്ച നടത്തും. പ്രതിരോധം, സുരക്ഷാ തുടങ്ങിയ മേഖലകളിൽ ഉയരുന്ന വെല്ലുവിളികളുമായി ബന്ധപ്പെട്ട് ഇരുനേതാക്കളും ചർച്ച നടത്തും.
ഇരു രാജ്യങ്ങളും തമ്മിലുള്ള ഉഭയകക്ഷി ബന്ധം ശക്തമാക്കുന്നതിന്റെ ഭാഗമായാണ് ഇരുവരുടെയും കൂടിക്കാഴ്ച. പ്രതിരോധം, സുരക്ഷ, ഊർജം, വ്യാപാരം, നിക്ഷേപം, പുതിയ സാങ്കേതികവിദ്യകൾ തുടങ്ങിയ മേഖലകളിൽ ഉൾപ്പെടെ ഇരുവരും ചർച്ച ചെയ്യും.
ദ്വിദിന സന്ദർശനത്തിനായി ഇന്ത്യയിലെത്തുന്ന ഫ്രഞ്ച് പ്രസിഡന്റ് ജയ്പൂരിലും സന്ദർശനം നടത്തും. ജനുവരി 25-നാണ് മാക്രോൺ ജയ്പൂരിലെത്തുന്നത്. സിഇഒമാർ, സാംസ്കാരിക, ശാസ്ത്രമേഖലകളിലെ പ്രമുഖ വ്യക്തികൾ എന്നിവരോടൊപ്പമാണ് അദ്ദേഹം സന്ദർശനം നടത്തുന്നത്. തുടർന്ന് പ്രധാനമന്ത്രിയോടൊപ്പം നടക്കുന്ന റോഡ് ഷോയിലും ഫ്രഞ്ച് പ്രസിഡന്റ് പങ്കെടുക്കും.
