പാലക്കാട്; ഒറ്റപ്പാലത്ത് കർഷകന്റെ വാഴത്തോട്ടം വെട്ടിനശിപ്പിച്ച് അജ്ഞാത സംഘം. തിരുവാഴിയോട് സ്വദേശി പ്രമോദിന്റെ കല്ലുവഴിയിലുള്ള കൃഷിയാണ് സംഘം നശിപ്പിച്ചത്. ഒന്നര ഏക്കർ വയലിലെ വാഴയും കവുങ്ങിൻ തൈകളും വെട്ടിയെറിഞ്ഞ നിലയിലാണ്.
ഇന്ന് രാവിലെയോടെ വാഴകൾ നനയ്ക്കാൻ എത്തിയപ്പോഴാണ് കൃഷി നശിപ്പിച്ചത് പ്രമോദിന്റെ ശ്രദ്ധയിൽപ്പെട്ടത്. 1,100 വാഴകളും 300-ലേറെ കവുങ്ങിൻ തൈകളുമായിരുന്നു കൃഷിയിടത്തിലുണ്ടായിരുന്നത്. ഇതിൽ കുല നാമ്പെടുക്കാൻ നിന്നിരുന്ന 500 വാഴകളും 300 കവുങ്ങിൻ തൈകളും അജ്ഞാതർ നശിപ്പിച്ചു. സംഭവത്തിൽ പാലക്കാട് ശ്രീകൃഷ്ണപുരം പോലീസിൽ പ്രമോദ് പരാതി നൽകിയിട്ടുണ്ട്. കൃഷി വെട്ടി നശിപ്പിച്ചത് ആരാണെന്നുള്ളതിൽ വ്യക്തതയില്ല.