കാസർകോട്: അയോദ്ധ്യയിൽ രാമക്ഷേത്രം ഉയരുന്നതിനായി 35 വർഷങ്ങളായി കാത്തിരുന്ന ഒരു നാടും നാട്ടുകാരുമുണ്ട് നമ്മുടെ ഈ കൊച്ചു കേരളത്തിൽ. അവരുടെ കാത്തിരിപ്പിന് ഇനി മണിക്കൂറുകൾ മാത്രം ബാക്കി. നാളെ നടക്കുന്ന പ്രാണ പ്രതിഷ്ഠാ ചടങ്ങിന്റെ സന്തോഷത്തിലാണ് കാസർകോട് ചേറ്റുകുണ്ടിലെ വിശ്വാസികൾ. 35 വർഷങ്ങൾക്ക് മുമ്പ് അയോദ്ധ്യയുടെ മണ്ണിൽ രാമക്ഷേത്രം ഉയരുന്നതിനായി എഴുതി വച്ച ചുമരെഴുത്തുകളും ഇവിടെ കാണാം.
കാഞ്ഞങ്ങാട് കാസർകോട് സംസ്ഥാന പാതയിൽ ചേറ്റുകുണ്ട് റെയിൽവേ ഗേറ്റിനു സമീപത്തായാണ് ഒരു പഴയ കെട്ടിടവും അതിലെ ചുമരെഴുത്തും ഇന്നും നിലനിൽക്കുന്നത്. 1989-ലാണ് രാഷ്‌ട്രീയ സ്വയം സേവക് സംഘത്തിന്റെ ആഹ്വാനപ്രകാരം അയോദ്ധ്യയിലെ രാമക്ഷേത്രത്തിനായി രാജ്യമെമ്പാടും ചുമരെഴുത്ത് നടത്തിയത്. നാട്ടിൽ പലയിടങ്ങളിലും ചുമരെഴുത്ത് ഉണ്ടായിരുന്നെങ്കിലും കാലങ്ങൾ പിന്നിട്ടപ്പോൾ അവയെല്ലാം മാഞ്ഞുമറിഞ്ഞു. എന്നാൽ ചേറ്റുകുണ്ടിലെ ചുമരെഴുത്ത് മാത്രം ഇവിടെയുള്ള വിശ്വാസികൾ മാറ്റാൻ സമ്മതിച്ചില്ല. അന്ന് ശ്രീരാമ ജന്മഭൂമി ക്ഷേത്രത്തിനായി ആഗ്രഹിച്ചിരുന്നെങ്കിലും സ്വപ്‌നം എന്നെങ്കിലും യാഥാർത്ഥ്യമാകുമെന്ന പ്രതീക്ഷയിലായിരുന്നു ഇവിടുത്തെ ജനങ്ങൾ.
അയോദ്ധ്യ ശ്രീരാമ ജന്മഭൂമി രാക്ഷേത്രം നിർമ്മിക്കാൻ ഹൈന്ദവ സംഘടനകൾ മുന്നോട്ട്, ശ്രീരാമ മന്ത്രം മുഴങ്ങട്ടെ എന്ന വാക്യങ്ങളാണ് കെട്ടിടത്തിന്റെ ചുമരിൽ എഴുതിയിരിക്കുന്നത്. തർക്ക മന്ദിരം പൊളിച്ചു മാറ്റിയപ്പോൾ പല ആക്രമണങ്ങളും ഇവിടുത്തെ ജനങ്ങൾ നേരിടേണ്ടി വവന്നിട്ടുണ്ട്. ആ ആക്രമണങ്ങളിലൊന്നും പതറാതെ ജയ് ശ്രീ റാം മുദ്രാവാക്യങ്ങൾ ഉയർത്തിപിടിച്ച് പിന്നീടും അവർ മുന്നോട്ടു പോയി. 35 വർഷങ്ങൾക്കു ശേഷം ഒരു നാടും നാട്ടുകാരും നെയ്‌തെടുത്ത സ്വപ്‌നം യാഥാർത്ഥ്യമാകാൻ ഒരുങ്ങുമ്പോൾ പ്രാണ പ്രതിഷ്ഠ ആഘോഷമാക്കാനുള്ള തയ്യാറെടുപ്പിലാണ് വിശ്വാസികൾ. ഇതിന്റെ ഭാഗമായി പ്രത്യേക പൂജകളും സംഘടിപ്പിക്കുമെന്നും ഹൈന്ദവ സംഘടനകൾ പറഞ്ഞു.
