ലക്‌നൗ: കശ്മീരി പണ്ഡിറ്റുകളെ പ്രതിനിധാനം ചെയ്താണ് അയോദ്ധ്യയിലെ പ്രാണ പ്രതിഷ്ഠാ ചടങ്ങിൽ താൻ പങ്കെടുക്കാനെത്തിയതെന്ന് ബോളിവുഡ് നടൻ അനുപം ഖേർ. കലാപത്തെ തുടർന്ന് 90- കളിലാണ് കശ്മീരി പണ്ഡിറ്റുകൾക്ക് സ്വന്തം നാട്ടിൽ നിന്ന് മറ്റിടങ്ങളിലേക്ക് പാലായനം ചെയ്യേണ്ടി വന്നത്. ഇത്തരത്തിലുള്ള ഒരു കൂട്ടം കശ്മീരി ഹിന്ദുക്കളെയാണ് ഞാൻ ചടങ്ങിൽ പ്രതിനിധീകരിക്കുന്നത്. 500 വർഷങ്ങൾക്ക് ശേഷമാണ് ശ്രീരാമൻ തന്റെ വീട്ടിലേക്ക് മടങ്ങിയെത്തുന്നതെന്നും അദ്ദേഹം പറഞ്ഞു.
ഭഗവാൻ ശ്രീരാമൻ തന്റെ വീട്ടിലേക്ക് മടങ്ങിയെത്തിയത് പോലെ ഉടൻ തന്നെ ഞങ്ങളും കശ്മീരിലേക്ക് മടങ്ങിയെത്തും. ലോകത്തെമ്പാടുമുള്ളവർ ഇന്നത്തെ പ്രാണപ്രതിഷ്ഠാ ചടങ്ങ് ആഘോഷിക്കും. മതപരമായ ചടങ്ങ് മാത്രമല്ല ഇന്നത്തേത്..അതൊരു ഉത്സവം കൂടിയാണ്. – അനുപം ഖേർ പറഞ്ഞു.
അയോദ്ധ്യയിലെ ഹനുമാൻ ഗാർഹി ക്ഷേത്രത്തിലും അദ്ദേഹം ദർശനം നടത്തിയിരുന്നു. ദർശനത്തിന് ശേഷം അയോദ്ധ്യയിലെ അന്തരീക്ഷം മനോഹരമാണെന്നും എല്ലായിടത്തും ജയ് ശ്രീറാം വിളികൾ മുഴങ്ങി കേൾക്കുകയാണെന്നും അദ്ദേഹം പറഞ്ഞു.
