പട്ന: കോൺഗ്രസ് നേതാവ് രാഹുലിനെതിരെ ആഞ്ഞടിച്ച് ജെഡിയു നേതാവ് നീരജ് കുമാർ. ജനതാദൾ(യുണൈറ്റഡ്) എൻഡിഎയിൽ ചേരുമെന്ന വാർത്തകൾക്കിടയിലും രാഹുലിന്റെ പദയാത്ര ബിഹാറിൽ പ്രവേശിക്കാനിരിക്കെയുമാണ് നീരജ് കുമാറിന്റെ വിമർശനം. ജോഡോ യാത്രകൾ കടന്നു പോകുന്ന ഇടങ്ങളിലെല്ലാം ഇൻഡി സഖ്യം തകരുകയാണെന്നും രാഹുലിന്റെ പദയാത്രകൊണ്ട് ഒരു പ്രയോജനവും ഉണ്ടാകാൻ പോകുന്നില്ലെന്നും അദ്ദേഹം മാദ്ധ്യമങ്ങളോട് പ്രതികരിച്ചു.
“കോൺഗ്രസ് പാർട്ടിക്കും രാഹുലിനും ഒരു പദയാത്ര നടത്താൻ അവകാശമുണ്ട്. എന്നാൽ ആ പദയാത്രയുടെ ഫലം എന്താണ്. അദ്ദേഹം ബംഗാളിൽ പോയി, മമത ബാനർജിയെ മാറ്റി നിർത്തി. ഇപ്പോൾ ബിഹാറിലേയ്ക്ക് പ്രവേശിക്കാൻ പോകുകയാണ്. ഇവിടെയും രാഷ്ട്രീയ സാഹചര്യങ്ങൾ മാറുകയാണ്”.
“രാഹുൽ എവിടെ പോയാലും സഖ്യകക്ഷികൾ അകന്നുപോകുകയാണ്. എന്തുകൊണ്ടാണ് സഖ്യ കക്ഷികൾ അകലുന്നതെന്ന് ആത്മപരിശോധന നടത്തണം. കോൺഗ്രസിന്റെയും രാഹുലിന്റെയും എല്ലാ തന്ത്രവും പരാജയപ്പെടുകയാണ്”- നീരജ് കുമാർ പറഞ്ഞു.
