മാറി വരുന്ന ജീവിതശൈലികൾ കൊണ്ടും, പാരമ്പര്യമായും പിടിപെടുന്ന രോഗങ്ങളിലൊന്നാണ് പ്രമേഹം. കുട്ടികളെന്നോ മുതിർന്നവരെന്നോ പ്രായഭേദമില്ലാതെ പിടിപ്പെടുന്ന ഈ രോഗത്തിന് കൃത്യമായ ആഹാര രീതികൾ പിന്തുടരേണ്ടതുണ്ട്. മധുരമടങ്ങിയ ഭക്ഷണങ്ങൾ, പ്രത്യേകിച്ച് പഞ്ചസാര അടങ്ങിയ ഭക്ഷണങ്ങൾ പ്രമേഹ രോഗികൾ ഒഴിവാക്കണമെന്ന് ഡോക്ടർമാർ നിർദ്ദേശം നൽകാറുണ്ട്. എന്നാൽ ശർക്കര അടങ്ങിയ ഭക്ഷണങ്ങൾ പ്രമേഹ രോഗികൾ കഴിച്ചാൽ കുഴപ്പമില്ലെന്നാണെങ്കിൽ അത് തെറ്റായ ധാരണയാണെന്നാണ് വിദഗ്ധർ പറയുന്നത്. പഞ്ചസാരയ്‌ക്ക് പുറമെ പ്രമേഹ രോഗികൾ പ്രധാനമായും കുറയ്‌ക്കേണ്ട ഭക്ഷണങ്ങൾ ഏതെല്ലാമെന്ന് നോക്കാം..
ശർക്കര
പഞ്ചസാരയെക്കാൾ ശർക്കര ഭക്ഷണത്തിൽ ഉൾപ്പെടുത്തേണ്ട ആഹാര പദാർത്ഥമാണെന്ന് നമുക്ക് അറിയാം. ശർക്കരയിൽ ധാരാളം ഇരുമ്പും, മഗ്നീഷ്യവും കാത്സ്യവും അടങ്ങിയിട്ടുണ്ട്. എന്നാൽ മിതമായ അളവിനെക്കാൾ കൂടുതലായാൽ പ്രമേഹ രോഗികൾക്ക് ശർക്കരയിലും പണികിട്ടും. പതിവായി ശർക്കര അമിത അളവിൽ കഴിക്കുന്നത് രക്തത്തിൽ പഞ്ചസാരയുടെ അളവ് വർദ്ധിപ്പിക്കുന്നതിന് കാരണമാകുന്നുവെന്ന് പഠനങ്ങൾ പറയുന്നു.
തൈര്
പ്രമേഹ രോഗികൾ തൈര് പതിവായി കഴിക്കുന്നത് ദഹന പ്രശ്‌നങ്ങൾ ഉണ്ടാക്കുന്നതിന് കാരണമാകുന്നുവെന്നാണ് വിദഗ്ധർ പറയുന്നത്. ഇത് കഴിക്കുന്നത് കഫം വർദ്ധിപ്പിക്കുന്നതിനും മെറ്റബോളിസം ശരിയായ രീതിയിൽ നടക്കുന്നതിനും തടസമാകുന്നു. പൊണ്ണത്തടി, കൊളസ്‌ട്രോൾ എന്നിവ വർദ്ധിപ്പിക്കുന്നതിനും തൈര് പതിവായി കഴിക്കുന്നത് കാരണമാകുന്നു.
ഉപ്പ്
പ്രമേഹം വർദ്ധിപ്പിക്കുന്നതിൽ ഉപ്പിന് പങ്കില്ലെങ്കിലും പ്രമേഹ രോഗികൾ ഉപ്പ് അമിതമായി കഴിക്കുന്നത് രക്ത സമ്മർദ്ദത്തിനും ഹൃദ്രോഗങ്ങൾ പെട്ടന്ന് പിടിപെടുന്നതിനും വഴിവെയ്‌ക്കുന്നു. കരൾ രോഗങ്ങൾ പിടിപെടുന്നതിനും പക്ഷാഘാതം സംഭവിക്കുന്നതിനും ഉപ്പ് അമിതമായി കഴിക്കുന്നത് കാരണമാകും. സാധാരണ ഉപ്പ് കഴിക്കുന്നതിനു പകരം ഇന്തുപ്പ് പോലുള്ളവ ഭക്ഷണത്തിൽ ചേർത്ത് കഴിക്കുന്നത് നല്ലതാണെന്നാണ് പഠനങ്ങൾ പറയുന്നത്.
