ഉപയോഗ ശൂന്യമായ വാഹനങ്ങൾ പൊതുവെ ആക്രിക്കച്ചവടക്കാർക്കും മറ്റും വിൽക്കുകയാണ് സാധാരണയായി എല്ലാവരും ചെയ്യുന്നത്. എന്നാൽ ചില സാഹചര്യങ്ങളിൽ വാഹന ഉടമ പോലീസ് സ്റ്റേഷൻ കയറി ഇറങ്ങേണ്ട സാഹചര്യം ഉണ്ടായേക്കാം. ഇതിനാൽ തന്നെ വാഹനം പൊളിക്കാൻ കൈമാറുമ്പോൾ രജിസ്ട്രേഷൻ സർട്ടിഫിക്കറ്റ് അഥവാ ആർസി റദ്ദാക്കണമെന്ന് എംവിഡി അറിയിച്ചു.
ആർസി റദ്ദാക്കാതെ പൊളിക്കാൻ കൈമാറുമ്പോൾ വാഹനം പുനരുപയോഗിക്കുന്ന സാഹചര്യം ഉണ്ടാകുന്നതിന്റെ പശ്ചാത്തലത്തിലാണ് നീക്കം. എന്നാൽ വാഹനം എന്തെങ്കിലും തരത്തിലുള്ള നിയമവിരുദ്ധ പ്രവർത്തനത്തിന് ഉപയോഗിച്ചാൽ നിയമനടപടികൾ സ്വീകരിക്കേണ്ടതായി വരും. ഇത്തരത്തിൽ നിരവധി കേസുകൾ രജിസ്റ്റർ ചെയ്തതിനെ തുടർന്നാണ് എംവിഡി മുന്നറിയിപ്പ് നൽകിയിരിക്കുന്നത്.
വീടുകൾ വാഹനം ഉപയോഗിക്കാതെ കിടന്ന് തുരുമ്പെടുക്കാറുള്ള സാഹചര്യം നിരവധിയാണ്. ഇവയിൽ അധികവും ഇരുചക്രവാഹനങ്ങളാണെന്നും ഉദ്യോഗസ്ഥർ പറയുന്നു. പഴയ സാധനങ്ങളെടുക്കാൻ ആളുകളെത്തുമ്പോൾ ഇത് തൂക്കി വിൽക്കുന്നു. എന്നാൽ ഇതിന്റെ ആർസി റദ്ദാക്കാത്തതാണ് പ്രധാന പ്രശ്നമായി പിന്നീട് പറയുന്നത്. വാഹനം വാങ്ങുന്നവർ ഇതിന്റെ തകരാർ പരിഹരിച്ച് വിൽക്കുകയോ പുനരുപയോഗിക്കുകയോ ചെയ്താൽ കൂടുതൽ പ്രശ്നങ്ങൾക്ക് വഴിവച്ചേക്കാം. വാഹനം അപകടത്തിൽപ്പെടുകയോ മോഷണം-കുറ്റകൃത്യങ്ങൾ എന്നിവയിൽ ഉപയോഗിച്ച് പിടിക്കപ്പെടുകയോ ചെയ്താൽ ഉടമയായിരിക്കും കുടുങ്ങുക.
വാഹനം പൊളിക്കാൻ നൽകുന്നതിന് മുമ്പ് ചെയ്യേണ്ട കാര്യങ്ങൾ….
വാഹനം പൊളിക്കാൻ നൽകാൻ തീരുമാനമെടുത്താൽ ഇത് എംവിഡി ഓഫീസിലെത്തി അപേക്ഷ സമർപ്പിക്കണം. ഏതെങ്കിലും തരത്തിലുള്ള നികുതി, പിഴ എന്നിവ നൽകാനുണ്ടെങ്കിൽ അത് അടയ്ക്കണം. നടപടിക്രമങ്ങൾ പൂർത്തിയാക്കിയതിന് ശേഷം ചേസിസ് നമ്പർ, എഞ്ചിൻ നമ്പർ എന്നിവ കട്ട് ചെയ്ത് വാഹനം പൊളിക്കണം. തുടർന്ന് എംവിഡി ഉദ്യോഗസ്ഥർ വാഹനം പൊളിച്ചുവെന്ന് റിപ്പോർട്ട് സമർപ്പിക്കും. ഇതോടെ മാത്രമാകും വാഹനത്തിന്റെ രജിസ്ട്രേഷൻ റദ്ദാക്കുകയെന്ന് എംവിഡി വ്യക്തമാക്കി.
