ശ്രീനഗർ: ചിലരുടെ അഹങ്കാരം കൊണ്ടാണ് കോൺഗ്രസിൽ നിന്ന് ജനങ്ങൾ രാജി വെയ്ക്കുന്നതെന്ന് മുൻ കോൺഗ്രസ് നേതാവും ഡെമോക്രാറ്റിക് പ്രോഗ്രസീവ് ആസാദ് പാർട്ടി (ഡിപിഎപി) അദ്ധ്യക്ഷനുമായ ഗുലാം നബി ആസാദ്. ഏതാനും ചിലരുടെ ബലഹീനതകളും അഹങ്കാരവും കൊണ്ട് കോൺഗ്രസ് പാർട്ടി അവസാനിക്കുകയാണെന്നും മഹാരാഷ്ട്ര മുൻ മുഖ്യമന്ത്രി അശോക് ചവാൻ പാർട്ടി വിട്ടത് കോൺഗ്രസിന് വലിയ തിരിച്ചടിയാണെന്നും ഗുലാം നബി ആസാദ് പ്രതികരിച്ചു.
‘ഞാൻ പാർട്ടി വിട്ടതിനാൽ കൂടുതലൊന്നും പറയാൻ ആഗ്രഹിക്കുന്നില്ല. അശോക് ചവാൻ കോൺഗ്രസിന് നിർണായക സംഭാവന നൽകിയിട്ടുള്ള വ്യക്തിയാണ്. അദ്ദേഹത്തിന്റെ പിതാവ് കോൺഗ്രസിന്റെ വലിയ നേതാവും കേന്ദ്രമന്ത്രിയും ആയിരുന്നു. എനിക്ക് ലഭിക്കുന്ന വിവരം അനുസരിച്ച് വരും ദിവസങ്ങളിൽ കൂടുതൽ പേർ കോൺഗ്രസ് പാർട്ടി വിടും. അവർക്ക് ഇത് വലിയ തിരിച്ചടിയായിരിക്കും’.
‘എന്റെ നിയമസഭാ ജീവിതം ആരംഭിച്ചതും മഹാരാഷ്ട്രയിൽ നിന്നാണ്. ഞാനും അവിടെ നിന്നുള്ള ഒരു ലോക്സഭാംഗമായിരുന്നു. ആദ്യമായി മഹാരാഷ്ട്രയിൽ നിന്നാണ് ഞാനും രാജ്യസഭയിലേക്ക് പോയത്. കോൺഗ്രസിനെ പുനരുജ്ജീവിപ്പിക്കാൻ കഴിയുന്ന ഒരു സംസ്ഥാനമേ ഇന്ത്യയിലുള്ളൂ, അത് മഹാരാഷ്ട്രയാണ്. യുപി, ബംഗാൾ തുടങ്ങിയ വലിയ സംസ്ഥാനങ്ങളിൽ കോൺഗ്രസ് അവസാനിച്ചു. കുറച്ചു പേരുടെ ബലഹീനതയും അഹങ്കാരവും കാരണവുമാണ് ഈ പാർട്ടി അവസാനിക്കുന്നത്’-ഗുലാം നബി ആസാദ് പറഞ്ഞു.
