മലയാളികൾ ഏറെ ആവേശത്തോടെ കാത്തിരുന്ന ചിത്രമാണ് ഭ്രമയുഗം. സിനിമയുടേതായി പുറത്തുവന്ന ആദ്യ അപ്ഡേഷൻ മുതൽ വലിയ ആവേശമാണ് പ്രേക്ഷകർക്ക് നൽകിയത്. ഇന്ന് തീയേറ്ററുകളിലും ചിത്രത്തിന് വൻ വരവേൽപ്പ് തന്നെയാണ് ലഭിച്ചത്. ആരാധകരുടെ പ്രതീക്ഷകൾക്ക് ഒട്ടും കോട്ടംതട്ടിയിട്ടില്ല. ചിത്രത്തിന്റെ ആദ്യ ഷോ പിന്നിടുമ്പോൾ വളരെ മികച്ച അഭിപ്രായമാണ് ചിത്രം നേടുന്നത്. മമ്മൂട്ടി പ്രധാനവേഷത്തിൽ എത്തിയ ചിത്രത്തിൽ അർജുൻ അശോകനും ശ്രദ്ധേയമായ വേഷം കൈകാര്യം ചെയ്യുന്നുണ്ട്.
ഇപ്പോഴിതാ ചിത്രത്തെയും മകന്റെ പ്രകടനത്തെയും പ്രശംസിച്ച് എത്തിയിരിക്കുകയാണ് പിതാവും നടനുമായ ഹരിശ്രീ അശോകൻ. ചിത്രം കണ്ടിറങ്ങിയ ശേഷം മാദ്ധ്യമങ്ങളോട് സംസാരിക്കുകയായിരുന്നു അദ്ദേഹം. ചിത്രത്തിൽ അർജുൻ അശോകൻ മികച്ച പ്രകടനം കാഴ്ച വച്ചു. മകന്റെ കരിയറിലെ മികച്ച ചിത്രങ്ങളിൽ ഒന്നാണ് ഭ്രമയുഗം. വളരെ സുപ്രധാനമായ ഒരു വേഷം മനോഹരമായാണ് മകൻ ചെയ്തതെന്നും അതിൽ അഭിമാനമുണ്ടെന്നും അദ്ദേഹം പറഞ്ഞു.
വളരെ ചുരുക്കം അഭിനേതാക്കളെ ഉൾപ്പെടുത്തിക്കൊണ്ട് ഒരു ബ്രഹ്‌മാണ്ഡ ചിത്രമാണ് സംവിധായകൻ അണിയിച്ചൊരുക്കിയിരിക്കുന്നത്. എല്ലാ അഭിനേതാക്കളും മികച്ച പ്രകടനമാണ് കാഴ്ചവെച്ചത്. ചിത്രത്തിലെ മകന്റെ പ്രകടനം തന്നെ അതിശയപ്പെടുത്തി. സംവിധാന മികവും തിരക്കഥയും സംഭാഷണവും എടുത്ത് പറയേണ്ടതാണെന്നും ചിത്രത്തിലെ മമ്മൂട്ടിയുടെ കഥാപാത്രം തന്നെ അതിശയിപ്പിച്ചെന്നും അദ്ദേഹം പറഞ്ഞു.
ഭ്രമയുഗത്തിന് ആദ്യ ദിനം തന്നെ മികച്ച പ്രതികരണം ലഭിച്ചതിൽ സന്തോഷമുണ്ടെന്നായിരുന്നു നടൻ അർജുൻ അശോകന്റെ പ്രതികരണം. ചിത്രം എല്ലാവരും അംഗീകരിക്കുന്നു എന്ന് അറിയുന്നതിൽ വലിയ സന്തോഷം തോന്നുന്നുണ്ടെന്നും താരം പറഞ്ഞു. കുടുംബസമേതം ഭ്രമയുഗം കണ്ടതിന് ശേഷം മാദ്ധ്യമങ്ങളോട് സംസാരിക്കുകയായിരുന്നു അർജുൻ അശോകൻ. മലയാളി പ്രേക്ഷകർ ഇതുവരെ കാണാത്ത മമ്മൂട്ടിയുടെ രൂപ-ഭാവ വിസ്മയം തന്നെയായിരുന്നു ഭ്രമയുഗം. ചിത്രത്തിന്റെ ഛായാഗ്രാഹണം നിർവഹിച്ചത് ഷെഹ്നാദ് ജലാലാണ്. രാഹുൽ സദാശിവനാണ് ഭ്രമയുഗം സിനിമയുടെ തിരക്കഥയും സംവിധാനവും നിർവ്വഹിച്ചിരിക്കുന്നത്.
