മുംബൈ: യഥാർത്ഥ എൻസിപി അജിത് പവാർ വിഭാഗമാണെന്ന് മഹാരാഷ്ട്ര നിയമസഭാ സ്പീക്കർ രാഹുൽ നർവേക്കർ. അജിത് പവാർ വിഭാഗം എംഎൽഎമാരെ അയോഗ്യരാക്കണം എന്നാവശ്യപ്പെട്ട് ശരദ് പവാർ വിഭാഗം നൽകിയ പരാതി തള്ളിക്കൊണ്ടായിരുന്നു സ്പീക്കറുടെ പരാമർശം.
അജിത് പവാറിന്റെ വിഭാഗമാണ് യഥാർത്ഥ എൻസിപി. 41 എംഎൽഎമാരുടെ പിന്തുണയാണ് അജിത് പവാറിന് നിയമസഭയിലുള്ളത്. പാർട്ടിയുടെ താത്പര്യമാണെന്ന് ഈ എംഎൽഎമാർ സംരക്ഷിക്കുന്നത്. അവരെ അയോഗ്യരാകാനാവില്ല. യഥാർത്ഥ എൻസിപിയായി അജിത് പവാർ വിഭാഗത്തെ തിരഞ്ഞെടുപ്പ് കമ്മിഷൻ അംഗീകരിച്ച കാര്യവും സ്പീക്കർ ചൂണ്ടിക്കാട്ടി.
മഹാരാഷ്ട്ര നിയമസഭയിൽ ആകെ 53 എൻസിപി എംഎൽഎമാരാണുള്ളത്. ഇതിൽ 41 എംഎൽഎമാർ അജിത് പവാറിനൊപ്പവും 12 എംഎൽഎമാർ ശരദ് പവാറിനൊപ്പവുമാണ്. അജിത് പവാർ ശരദ് പവാറിനെതിരെ മത്സരിക്കുകയും മഹാരാഷ്‌ട്രയിലെ ബിജെപി-ശിവസേന സർക്കാരിൽ ചേരുകയും ചെയ്തതോടെയാണ് എൻസിപി പിളർന്നത്. ഇതോടെ പാർട്ടി പേരും ചിഹ്നവും ശരദ് പവാർ പക്ഷത്തിന് നഷ്ടപ്പെട്ടിരുന്നു. നാഷണലിസ്റ്റ് കോൺഗ്രസ് പാർട്ടി ശരദ് ചന്ദ്ര പവാർ എന്നാണ് ശരദ് പവാർ വിഭാഗം ഇപ്പോൾ അറിയപ്പെടുന്നത്.
