തിരുവനന്തപുരം: കല്ലമ്പലം ആഴംകോണത്ത് കാറിൽ കടത്താൻ ശ്രമിച്ച കഞ്ചാവുമായി യുവാവ് പിടിയിൽ. തമിഴ്‌നാട് സ്വദേശി ശങ്കറാണ് പിടിയിലായത്. ഇയാളുടെ പക്കൽ നിന്നും 80 കിലോ തൂക്കം വരുന്ന കഞ്ചാവ് പാക്കറ്റ് പിടിച്ചെടുത്തതായി എക്‌സൈസ് അറിയിച്ചു. ഇയാൾക്കൊപ്പമുണ്ടായിരുന്ന സുഹൃത്ത് ഓടി രക്ഷപ്പെട്ടു. ഇയാൾക്കായുള്ള അന്വേഷണം നടത്തി വരികയാണ്.
ഇന്നലെ വൈകിട്ട് ആറ് മണിയോടെയാണ് സംഭവം. കല്ലമ്പലത്ത് എക്‌സൈസ് നടത്തിയ വാഹന പരിശോധനയ്‌ക്കിടെയാണ് പ്രതി പിടിയിലായത്. എക്‌സൈസ് ഉദ്യോഗസ്ഥർ കൈ കാണിച്ചപ്പോൾ യുവാവ് വാഹനം നിർത്തിയെങ്കിലും ഇയാൾക്കൊപ്പമുണ്ടായിരുന്ന സുഹൃത്ത് ഓടി രക്ഷപ്പെടുകയായിരുന്നു. ശങ്കറും രക്ഷപ്പെടാൻ ശ്രമിച്ചെങ്കിലും ഇയാളെ എക്‌സൈസ് ഉദ്യോഗസ്ഥർ പിടികൂടി. തുടർന്ന് നടത്തിയ പരിശോധനയിലാണ് വാഹനത്തിൽ നിന്നും കഞ്ചാവ് പിടികൂടിയത്.
കാറിൽ നിന്നും 32 പാക്കറ്റുകളിലായി സൂക്ഷിച്ചു വച്ചിരുന്ന കഞ്ചാവാണ് പിടികൂടിയത്. കാറിൽ നിന്നും ഓടി രക്ഷപ്പെട്ട വ്യക്തിയുടെ പേരിൽ നിരവധി കേസുകൾ തമിഴ്‌നാട് പോലീസ് രജിസ്റ്റർ ചെയ്തിട്ടുണ്ടെന്ന് എക്‌സൈസ് പറഞ്ഞു. എക്‌സൈസ് സർക്കിൾ ഇൻസ്‌പെക്ടർ ഷാജഹാൻ, ഇൻസ്‌പെക്ടർ ഷൈജു എന്നിവരുടെ നേതൃത്വത്തിൽ നടത്തിയ മിന്നൽ പരിശോധനയിലാണ് കഞ്ചാവ് പിടികൂടിയത്.
