ന്യൂഡൽഹി: യുണൈറ്റഡ് സ്റ്റേറ്റ്സ് ഇൻഡോ-പസഫിക് കമാൻഡിന്റെ അഡ്മിറൽ ജോൺ ക്രിസ്റ്റഫർ അക്വിലിനോയുമായി കൂടിക്കാഴ്ച നടത്തി സംയുക്ത സേനാ മേധാവി ജനറൽ അനിൽ ചൗഹാൻ. അമേരിക്കയും ഇന്ത്യയും നേരിടുന്ന സമകാലിക സുരക്ഷാ വെല്ലുവിളികളെ കുറിച്ച് ഇരുവരും ചർച്ച നടത്തി. സുരക്ഷാ വെല്ലുവിളികളെ കുറിച്ചും ഉഭയകക്ഷി പ്രതിരോധ സഹകരണത്തെ കുറിച്ചും മികച്ച രീതിയിൽ ചർച്ച നടന്നതായി ഹെഡ്ക്വാർട്ടേഴ്സ് ഇന്റഗ്രേറ്റഡ് ഡിഫൻസ് സ്റ്റാഫ് സമൂഹമാദ്ധ്യമത്തിൽ കുറിച്ചു.
” സംയുക്ത സേനാ മേധാവി ജനറൽ അനിൽ ചൗഹാൻ, യുഎസ് ഇൻഡോപാകോം അഡ്മിറൽ ജോൺ സി അക്വിലിനോ എന്നിവർ തമ്മിൽ കൂടിക്കാഴ്ച നടന്നു. അമേരിക്കയും ഇന്ത്യയും തമ്മിലുള്ള ബന്ധം ഊട്ടി ഉറപ്പിച്ച് കൊണ്ട് സമകാലിക സുരക്ഷാ വെല്ലുവിളികൾ, തന്ത്രപരമായ താത്പര്യങ്ങൾ, ഉഭയകക്ഷി പ്രതിരോധ സഹകരണം എന്നീ വിഷയങ്ങളിൽ കാര്യക്ഷമമായ ചർച്ച നടന്നതായി” എച്ച്ക്യു ഐഡിഎസ് എക്സിലൂടെ അറിയിച്ചു.
കഴിഞ്ഞ ദിവസം ലോക്ഹീഡ് മാർട്ടിൻ പ്രൈവറ്റ് ലിമിറ്റഡിന്റെ പ്രതിനിധി സംഘവുമായും ജനറൽ അനിൽ ചൗഹാൻ സംവദിച്ചിരുന്നു. മേക്ക് ഇന്ത്യ ഇന്ത്യയുമായും ഇന്ത്യൻ പ്രതിരോധ വ്യവസായവുമായും ബന്ധപ്പെട്ടായിരുന്നു ചർച്ച. ഇന്റർനാഷണൽ ബിസിനസ് വൈസ് പ്രസിഡന്റ് റെയ്മണ്ട് പിസെല്ലിയുടെ നേതൃത്വത്തിലാണ് പ്രതിനിധി സംഘം എത്തിയതെന്നും എച്ച്ക്യു ഐഡിഎസിന്റെ മറ്റൊരു പോസ്റ്റിൽ പറയുന്നു. എയറോസ്പേസ് മേഖലയിലുള്ള ഉത്പന്നങ്ങളുടെ നിർമ്മാണം, ഗവേഷണം എന്നിവയിൽ ഏർപ്പെട്ടിരിക്കുന്ന കമ്പനിയാണ് ലോക്ക്ഹീഡ് മാർട്ടിൻ.
