മുംബൈ: മഹാരാഷ്‌ട്ര കോൺഗ്രസ് വർക്കിംഗ് പ്രസിഡന്റ് ബസവരാജ് പാട്ടീൽ പാർട്ടി വിട്ടു. ഉപമുഖ്യമന്ത്രി ദേവേന്ദ്ര ഫഡ്നാവിസ്, ബിജെപി അദ്ധ്യക്ഷൻ ചന്ദ്രശേഖർ ബവൻകുലെ എന്നിവരുടെ സാന്നിധ്യത്തിൽ ഇന്ന് വൈകിട്ട് ബിജെപിയിൽ ചേർന്നേക്കുമെന്നാണ് സൂചന. ഇന്ന് രാവിലെ ഫഡ്നാവിസിന്റെ വസതിയിലെത്തി പാട്ടീൽ കൂടിക്കാഴ്ച നടത്തിയിരുന്നു.
സംസ്ഥാനത്തെ മുൻ മന്ത്രി കൂടിയാണ് പാട്ടീൽ. ഔസ നിയമസഭാ മണ്ഡലത്തിൽ നിന്നും രണ്ട് തവണ ജനപ്രതിനിധിയായി തിരഞ്ഞെടുക്കപ്പെട്ടിട്ടുള്ള അദ്ദേഹം, മറാഠ്‌വാട മേഖലയിലെ സുപ്രധാന ലിംഗായത്ത് നേതാവ് കൂടിയാണ്.
എന്നാൽ പാട്ടീലിന്റെ രാജിക്കത്ത് ഇതുവരെ ലഭിച്ചിട്ടില്ലെന്നാണ് കോൺഗ്രസ് പാർട്ടി അദ്ധ്യക്ഷൻ നാന പാത്തോൾ പ്രതികരിച്ചത്. കഴിഞ്ഞ ഏതാനും നാളുകളായി പാർട്ടി യോഗങ്ങളിൽ പാട്ടീൽ പങ്കെടുക്കാറില്ലെന്നും കോൺഗ്രസ് അറിയിച്ചു.
